Ryan Falzon huwa artist viżiv, kittieb u edukatur. Ix-xogħol tiegħu hu sinonimu ma’ pittura b’kuluri jgħajtu, motivi florali, karozzi, ir-rappreżentazzjoni tal-ġisem uman, id-dinja tal-Internet, slogans u kummenti mislufa mill-ġrajjiet kurrenti u l-kultura popolari. Bħala artist viżiv, Falzon esibixxa f’numru ta’ wirjiet lokali u internazzjonali. L-arti tiegħu hija espressiva, vibranti, aggressiva u melankonika, fejn il-politiku jsir personali biex joħloq narrattiva friska. Falzon ħareġ l-ewwel rumanz tiegħu Sajf fl-2022, ippubblikat minn Kotba Calleja. Kitbiet oħra ta’ Falzon dehru f’diversi antoloġiji matul is-snin. Ix-xogħol riċenti tiegħu, kemm viżiv kif ukoll miktub, idur mal-ġenerazzjoni millenjali, ix-xenarji postpandemiċi, relazzjonijiet, duwalità u divinità.