Kristina Borg hija artista u riċerkatriċi li taħseb b’lingwaġġ viżiv. Tfittex li toħloq esperjenzi transdixxiplinari permezz tal-istejjer u n-narrattivi fi proċessi ta’ kokreazzjoni ma’ komunitajiet ta’ speċijiet diversi — umani u iktar-minn-umani. Tqatta’ ħafna mill-ħin tagħha timxi, tosserva, tisma’ u tiddjaloga ma’ komunitajiet speċifiċi, dejjem f’relazzjoni mal-ispazji u l-postijiet fejn jgħixu. Il-kuntesti u s-sitwazzjonijiet speċifiċi huma dettalji li jsawru l-qofol tax-xogħol tagħha, li jittratta temi soċjopolitici, ekonomiċi, ambjentali u femministi. Ħafna drabi x-xogħol tagħha jimmanisfeta ruħu fi spazji urbani u kollettivi — spazji pubbliċi fil-bliet u l-irħula, imma anki spazji mhux tas-soltu, bħas-supermarket, spazji dojoq bħall-bankina, jew spazji miftuħin bħall-baħar u l-għelieqi. Kristina esibixxiet f’numru ta’ wirjiet lokali u internazzjonali. Hija rebħet il-premju Divergent Thinkers–Malta fl-2014, u fl-2020 il-proġett kollaborattiv tagħha Nimxu Mixja rebaħ il-Premju għall-Arti tal-Kunsill Malti għall-Arti fil-kategorja l-aqwa proġett fil-komunità. Fl-2023 kienet finalista għall-premju New European Bauhaus għall-proġett You Are What You Buy — Reap what you sow / Dak li tiżra’ taħsad. Kristina hija membru tas-Salzburg Global Forum for Cultural Innovators u tal-Community Economies Research Network.