Iddeċidejt li ma mmurx Odesa għalissa.Noah: Kemm togħġobni l-ewwel sentenza! “Iddeċidejt li ma mmurx Odesa għalissa.” Qisha l-ewwel sentenza ta’ rumanz klassiku, u tqiegħdek fl-atmosfera tal-kitba li ġejja. Fil-fatt din l-ewwel entrata kollha tindika dak kollu li hu importanti fl-entrati li ġejjin — il-porożità tal-fruntieri, ir-relazzjoni ta’ Ira m’ommha, ix-xogħol fil-laboratorju, u l-gwerra fl-Ukrajna fl-isfond. Semmejtha lil Ira din, meta ltqajna biex induru l-ewwel parti tat-traduzzjoni, u qablet li din l-ewwel entrata importanti biex tissedimenta l-kunċetti li ħa jidhru iktar ’il quddiem. Vera nixtieq, qed nixxennaq biex immur. Imma ommi qed tkun isterikament imbeżżgħa għalija. U jien bdejt nittieħed ukoll mill-inkwiet tagħha. Fejn tibda hi u fejn nibda jien qed jisfumaw.L-immaġni ta’ “our boundaries are blurry” togħġobni ħafna u naħseb li ħa jkun kunċett importanti f’dak li ġej — m’iniex daqshekk sodisfatt b’din it-traduzzjoni, tinħass daqsxejn sfurzata jew poetika żżejjed forsi? Qed naħseb f’alternattivi oħrajn li forsi jġebbdu ftit is-sens tal-oriġinal — “Minn dejjem konna nittieħdu minn xulxin.” (tkompli ma’ ta’ qabilha) “M’iniex ċerta fejn tispiċċa hi u fejn nibda jien” (titlef l-idea tal-isfumar). Issa rrid nirritorna l-biljetti tal-ajru li qtajna għal Chișinău. Kieku ntiru sal-Moldova u naqbdu coach biex naqsmu l-fruntiera Ukrena għal Odesa. Jimmy kien qed jibża’ imma kien eċitat ukoll. Wara dawn is-snin kollha li ilu jafni, għadu qatt ma mar. Nixtieq nemmen li se nkun nista’ mmur hemm fl-2023. Mank! Imma did-darba, iddeċidejt li ma mmurx. U issa, f’daqqa waħda, minħabba li biddilna l-pjanijiet, għandi tliet ġimgħat liberi qabel ma nibda xogħol ġdid fil-laboratorju. X’ħa naqbad nagħmel? Qiegħda naqra mifxula. Ħa nikteb dak kollu li jiġi f’moħħi, imbagħad naraw.Noah: Kemm togħġobni l-ewwel sentenza! “Iddeċidejt li ma mmurx Odesa għalissa.” Qisha l-ewwel sentenza ta’ rumanz klassiku, u tqiegħdek fl-atmosfera tal-kitba li ġejja. Fil-fatt din l-ewwel entrata kollha tindika dak kollu li hu importanti fl-entrati li ġejjin — il-porożità tal-fruntieri, ir-relazzjoni ta’ Ira m’ommha, ix-xogħol fil-laboratorju, u l-gwerra fl-Ukrajna fl-isfond. Semmejtha lil Ira din, meta ltqajna biex induru l-ewwel parti tat-traduzzjoni, u qablet li din l-ewwel entrata importanti biex tissedimenta l-kunċetti li ħa jidhru iktar ’il quddiem. L-immaġni ta’ “our boundaries are blurry” togħġobni ħafna u naħseb li ħa jkun kunċett importanti f’dak li ġej — m’iniex daqshekk sodisfatt b’din it-traduzzjoni, tinħass daqsxejn sfurzata jew poetika żżejjed forsi? Qed naħseb f’alternattivi oħrajn li forsi jġebbdu ftit is-sens tal-oriġinal — “Minn dejjem konna nittieħdu minn xulxin.” (tkompli ma’ ta’ qabilha) “M’iniex ċerta fejn tispiċċa hi u fejn nibda jien” (titlef l-idea tal-isfumar).
Niżfen
Ngħum
Mixjiet twal fix-xemx
Niltaqa’ ma’ sħabi nisa
Nivvjaġġa s’għand Liza D
Nivvjaġġa s’għand Clara G-F
Noqgħod mal-baby ta’ AliceNixtieq nikteb “tarbija” imma nħossha sfurzata fil-kuntest ta’ djarju, fis-sens fil-ħajja ta’ kuljum “baby” ngħidu… diskutibbli. Għażla oħra — tifel/tifla, żgħir/żgħira.
Norganizza l-istudio mill-ġdid
Mużajk
Insir inħobb ’l Amsterdam u l-imkejjen misturi tagħha
Ikliet mal-ħbieb
Inċempel lin-nanna iktar spiss
Naqra x-xogħol ta’ Lesya Ukrainka (ili biex)
Pikniks
Inpinġi komiks dwar futuri possibbli
Nerġa’ ngħaqqad l-albums tal-bijoloġija u l-botanika minn żmien l-università
Kapaċi noqgħod mingħajr midja soċjali għal dawn il-ġimgħat?
Stramba dil-lista, naqra ferriħija żżejjed għall-gosti tiegħi.
L-għażla rebbieħa hi — ħa mmur vjaġġ inżur ’il sħabi nisa.
It-Tlieta, 20 ta’ Settembru 2022
Qed naħseb fuq l-inerzja, l-apatija u l-biża’. U kif il-biżgħat tal-oħrajn jaqbżu fuqek u jżidulek tiegħek. Qed naħseb fuq il-kollegi tiegħi artisti — fuq ix-xewqa u l-passjoni li għandhom għas-suċċess (ħafna minnhom li naf, għall-inqas). B’xi mod qed insibni miexja kontra l-imħabba tiegħi lejn l-umiltà. Nammiraha u ngħir għaliha dil-forza kruda kollha passjoni.Ira qaltli li kellha kurżità fuq kif se nittraduċi t-termini iktar spiritwali. Fil-verità, ħafna minnhom jinstemgħu pjuttost friski u neoloġiċi għalija bl-Ingliż ukoll, jiġifieri ma ddejjaqtx nivvinta bil-Malti. Iktar sibtha diffiċli nittraduċi kliem dwar is-saħħa mentali, bħal “inertia” jew “depressed”, mingħajr ma nuża ħafna “waqajt ħażin”, li qisu t-terminu ppreferut tal-ġenerazzjoni tiegħi u ftit ikbar minni għal kull tip ta’ skumdità tal-moħħ. Togħġobni bħala frażi, “waqajt ħażin”, għax miftuħa u tista’ tapplikaha fuq skali differenti, u ttik sens ta’ ċaqliq orizzontali. Imma ma tfissirx “depressed” eżatt. Qed niddubitaha; ma nistax insibha fija. Din inerzja? Apatija? Fejn hi l-passjoni tiegħi? Ilni f’dal-istat illajmat, nofsni rieqda (depressa?) dawn l-aħħar għaxart ijiem. Bla motivazzjoni.
Naħseb li kultant tajjeb tkun f’dal-istat. Kwistjoni tal-perspettiva li minnha nħarsu lejha l-biċċa. Xorta għadni nċekċek ftit; qattajt naqra ħin ma’ Alice, Katya, iz-zija Yulya, u Ira B. Ġibt ir-rota lura minn Leiden għal Amsterdam u għalaqt il-kapitlu ta’ ħajti f’dak il-laboratorju. Ovvjament, għaddejja minn żmien ta’ niket; hemm gwerra, u n-niket jieħu x-xogħol. Naħseb li qed jiġru affarijiet żgħar u viżibbli; il-ħajja mhix staġnata, imma lanqas mhi xi funtana ta’ attività u avvenimenti. Għala tinħass iktar faċli funtana ta’ attività? Qisu, “Jien qed nagħmel hekk, hekk u hekk”Togħġobni “I am doing” waħedha, imma “jien qed nagħmel” ma daqqitlix. Però jista’ jkun li rridu nintroduċuha. huwa stat superjuri, aħjar. Il-verżjoni tiegħi ta’ bħalissa kieku twieġeb, “Qed nagħmel ħafna, ta. Minn ġewwa. Ħafna xogħol minn ġewwa.” (Niktibha u lanqas jien stess ma naċċettaha għalkollox din; hemm suspett inerenti dwar ix-“xogħol minn ġewwa” bħala xogħol; mhux għażż jiġi dan?).
Hemm ħafna proċessi għaddejjin f’ħajti bħalissa. Għaddejjin. Naf li qed tinbidel xi ħaġa b’mod introvers. M’iniex kapaċi għalkollox nifformula b’mod intelliġenti dawn il-proċessi fi kliem. Wieħed minn dawn il-proċessi għandu x’jaqsam mal-identifikazzjoni tiegħi nnifsi, in-nazzjonalità, il-ħsibijiet tiegħi fuq il-fruntieri, il-kultura Ukrena, ir-relazzjoni mill-bogħod imma profonda li għandi man-nies u l-ħajja t’hemm, mingħajr ma “nagħmel” dik il-ħajja hemm.Hawn togħġobni “doing” bħala verb, bħala “doing a life”, forsi jagħmel tajjeb li l-idjosinkrasija tibqa’ kif inhi. Ikkunsidrajt “ngħix il-ħajja t’hemm”, “nipparteċipa fil-ħajja t’hemm” imma l-ebda minn dawn m’għandhom l-istess forza aġentiva. Qed nitgħallem dwarha u dwari fiha/f’relazzjoni magħha. Proċess ieħor huwa r-relazzjoni m’ommi: li naċċettaha ta’ li hi, u li niddakkar minn dir-relazzjoni minkejja l-biża’ (il-biżgħat tagħha, u l-biża’ tiegħi mill-biżgħat tagħha). Il-mumenti meta nidħqu kollha flimkien — ommi, missieri, Sasha u jien — huma prezzjużi wisq. Dis-sena ta’ gwerra hija ħafna dwar il-familja.
Ukoll, dwar il-familja Maltija tiegħi. Huma inkredibbli u jappoġġjawni ħafna. Iktar kmieni dis-sena tfajna l-applikazzjoni għall-passaport. Xi darba, ħa nkun Ukrena-Maltija.
Kont qed naqra dwar ir-reġjuni etnografiċi tal-Ukrajna u ħsibt fuq kemm huma fluwidi u interessanti dawn il-mapep, u li vera hemm xi tip ta’ għaqda bejn dawn il-fruntieri porużi.Tħassibt sew fuq il-kunċetti tal-porożità u l-fluwidità kif tippreżentahom Ira f’dan id-djarju. Huma kunċetti importanti li joħolqu bażi għall-ħsieb tagħha u kelli bżonn insib mod konsistenti u ċar kif se nittraduċihom għall-Malti. L-iġsma li jnixxu huma dwar il-fruntieri porużi, u l-vjolenza u s-solidifikazzjoni ta’ dawn il-fruntieri huma direttament relatati.Pereżempju, qed titkellem dwar ommha meta tgħid “our boundaries are blurry”. Veru kien importanti li naqbad ma’ dan is-sens fluwidu ta’ bejn l-iġsma u l-“fruntieri” tagħhom. Ippruvajt dawn il-verżjonijiet — “fejn nibda jien u fejn tibda hi qed jisfuma”, “minn dejjem konna nittieħdu minn xulxin”, li tkompli ma’ kif ittraduċejt “jien bdejt nittieħed mill-inkwiet tagħha” fil-vers ta’ qabel, jew inkella “m’iniex ċerta fejn tispiċċa hi u fejn nibda jien.” Naħseb li l-ebda minnhom ma taqbad sew dak is-sens fejn l-ispazju bejn l-iġsma u l-imħuħ jisfuma, avolja l-iktar li tasal viċin forsi hi l-verżjoni fejn użajt il-verb “nittieħed”.
Kif se nasal għal dik il-passjoni tal-artist (Latin Amerikan) fil-jien (mix-Xlokk tal-Ewropa) apatetiku tiegħi nnifsi? L-arti għalfejn għandha bżonn il-pubbliku? L-arti tiegħi għalfejn għandha bżonn il-pubbliku? Għax ma nagħmilhiex privatament, bħala prassi ta’ awtoespressjoni ta’ fejqan. Żgur ma rridx li sempliċiment noħloq ix-xogħol performattiv tiegħi fir-rokna tal-kamra tas-sodda; irrid ikolli udjenza preżenti. Imma x’fih dak il-proċess li jkollok ix-xhieda għal dak li qed tagħmel? X’tip ta’ maġija hi dik li sseħħ meta jkollok xhieda għal dak li qed tagħmel?
Ħlomt b’lukanda l-lejl li għadda. Kienet lussuża, b’ħafna sulari, u probabbli konna hemm għal xi festival jew avveniment tal-arti. Il-biljetti ngħataw u tqassmu. Kien hemm Elioa, Gabino, ommi u oħti, u ħafna nies oħra. Żewġt irġiel urewni ġildithom bħallikieku kelli ntihom xi parir mediku.
Żgur, dil-bidla fil-pjan u li mhux sejra l-Ukrajna, kellhom impatt fuqi. Ridt insib l-albums tad-disinn tax-xjenza mis-snin tal-università; nixtri kotba ta’ Lesya Ukrainka; nieħu r-ritratti u niddokumenta l-vjaġġ. Kont qed insegwi xenqa mqanqla li mmur f’pajjiż twelidi; kien hemm ċerta tfittxija eżistenzjali għas-sens, bħal dak ta’ minn fejn jien u kif nirrelata mal-post fejn twelidt, li issa hemm it-theddida li jinqered, li jisparixxi. Dan kien differenti mill-iffilosofizzar dwar it-traxxendenza mir-rokna favorita tas-sufan komdu tiegħi. U għalhekk (għal darb’oħra) ma smajtx minn qalbi (erġajt). Imma, jekk nevitaw li naħsbu b’mod duwalistiku, iswed u abjad, ma smajtx minn qalbi b’rispett ta’ emozzjoni. B’rispett tal-konnessjoni u b’rispett tal-biża’. Biex tqum kontra l-biża’, trid tkun b’saħħtek. Bħalissa, inħossni mkissra u vulnerabbli, u qed nieħu ħsieb saħħti.
Jista’ jkun li proċess ieħor li għaddej bħalissa huwa li naċċetta l-ħażen, il-qerda u l-vjolenza bħala parti mill-proċessi li jagħmlu d-dinja u l-kosmoloġija. Kull min għallimni li l-ħajja hija biss unikorni f’armonija jiġġerrew fil-witat xemxija, gidibli.
21 ta’ Settembru 2022
Merħba bik, ekwinozju! Merħba bik, l-isbaħ żmien biex issaqsi l-mistoqsijiet fl-irqad!Jien u Ira ltqajna Għawdex l-ewwel darba biex nitkellmu fuq dan il-proġett. Kien is-sajf, u l-pjazza tan-Nadur kienet imdawla xemx safranija waqt li tkellimna fuq il-kitba, il-fluwidità bejn il-lingwi, il-ħoloq bejn Malta, l-Olanda u l-Ukrajna, u qabbilna x-xogħol l-università, anke jekk fi żminijiet u fakultajiet differenti. Minn laqgħat bħal dawn dejjem noħroġ b’sens ta’ entużjażmu għal proġett u għall-kitba, u nkun irrid inżomm il-fergħat u l-mogħdijiet kollha tal-konverżazzjoni f’moħħi.
Kelli ġurnata bellezza, u qattajt il-maġġorparti tagħha niżbarazza l-ispazju ta’ madwari — naħsel, innaddaf, inneħħi l-weraq mejjet mill-pjanti fil-gallarija. Nieħu pjaċir intektek b’dan ix-xogħol tad-dar; moħħi jaħseb iktar ċar. Meta Jimmy ġie lura mill-“ewwel ġurnata xogħol” għand DAS, ħawwarna flimkien it-taħlita tal-pulpetti tal-ħut t’ommu Doris. M’għandix dubju li Doris qiegħda l-ġenna, teżisti jew ma teżistix il-ġenna; hi kienet temmen li teżisti, allura jistħoqqilha tistrieħ hemm għall-eternità.
Is-sessjoni tat-terapija ma’ Anna ta’ filgħodu marret tajjeb. Indunajt li mxejt ftit ’il quddiem fir-relazzjoni m’ommi. Xorta għadha tqila u kumplessa, imma nieħu gost ninduna bi xquq żgħar iħallu d-dawl jgħaddi. Ommi mara b’saħħitha, u tkun trid li l-affarijiet jiġru, u li n-nies iġibu ruħhom, skont kif tixtieq hi. Jien qed infittex il-fluwidità u l-fehim reċiproku fir-relazzjoni tagħna. Jgħidu li l-ommijiet u l-bniet ħafna drabi jkollhom relazzjonijiet kumplessi.
Għandi mistoqsija għall-irqad tiegħi, u għal Merkurju! Għażiż Merkurju Każimi, għandi bżonn il-gwida u l-parir tiegħek. Ħa nkun miftuħa għall-ġestiMhumiex kliem! “gestures” — ma rridx nirrepeti “pariri” tiegħek ta’ kunsill u se nipprova ninterpretahom bl-akbar integrità. Għażiż Merkurju, tista’ turini kif nerġa’ nkebbes in-nar tal-passjoni li kelli biex nibni karriera f’li nagħmel l-arti? Għajejt b’dil-letarġija (biża’?) li qed tissedimenta fija.
Grazzi. Iddi bil-qawwa.
22 ta’ Settembru 2022
Il-lejl kien kollu dwar l-Ukrajna — aħbarijiet, diskussjonijiet, opinjonijiet, Putin u suldati.
Tant hi fil-fond tal-psike tiegħi…
Ma nafx kif għandi ninterpretahom dawn għall-mistoqsija tiegħi.
Kelli d-dwejjaq dalgħodu kif indunajt kemm daħalli fil-fond tal-psike l-inkwiet dwar il-gwerra fl-Ukrajna. Probabbli aħjar ma niġġilidlux. Inċedilu u nintelaq mas-subkonxju tiegħi.
23 ta’ Settembru 2022
Dal-lejl kien dwar il-ħbieb. Ħlomt li kont insejt il-birthday ta’ Lisa S.“għeluq snin” imma tinħass falza Ħaġa stramba li ħa tagħlaq sninha ġimgħa oħra, fl-ewwel ta’ Ottubru! Ma kontx naf. Sirt naf biss meta qomt u kellimtha. Fil-ħolma konna qegħdin xi mkien medjevali, bħal xi mkejjen ta’ Malta. Iżda kien hemm tensjoni bejn Malta u Amsterdam. Ukoll, kollox kien fluwidu — iż-żewġ postijiet fil-ħolma tiegħi saru wieħed; il-ħbieb, l-arkitettura u l-ikel inħallu f’xulxin.Ilbieraħ ġew jieklu għandi sħabi u kellna burdati differenti. Min ried jaħraq kulm’haw għax kienet qed tħoss li l-attiviżmu mhux biżżejjed, min bdiet tgħid li n-nuqqas ta’ ingaġġament mal-istituzzjonijiet żammha milli tikkrolla fid-dwejjaq jew li tħossha inutli. Ftakart fis-sens fid-djarju ta’ Ira ta’ xi ħaġa enormi tidħollok taħt il-ġilda u tpittirlek l-emozzjonijiet kollha li tesperjenza fil-ħajja ta’ kuljum. Tikteb b’mod dirett ħafna fuqu dan l-affett, Ira, u joħroġ kważi minn bejn il-vrus tad-djarju, das-sens ta’ toqol kbir, assurdità u inċertezza fuq kif tista’ twieġeb għaliha — il-vjolenza u l-poter fuq skali minn internazzjonali, għal dawk fix-xogħol, għal dawk bejn il-familja. Fakkarni daqsxejn f’dak il-paragrafu kbir fil-memoir ta’ Mourid Barghouti, fejn jibda minn kuċċarina fuq mejda u jgħid li l-politika hija kollox. Naħseb li jekk induru lejn kitba minn awturi Palestinjani għandna arkivju sħiħ ta’ kif nindirizzaw dan l-affett; tal-qtugħ mill-vjolenza strutturali u internazzjonali li tkompli tkattar il-kolonjaliżmu minn ġenerazzjoni għall-oħra. Imma fl-istess ħin, kif bdejna ngħidu waqt l-ikla, għalxejn tipprova tiddjaloga ma’ rappreżentant ta’ sistema li ħa ddawwarlek kull kelma u verità f’sors ta’ profitt jew sfruttar. Trid tmur taħraq. U mhux tkisser, għax mit-tiġrif kważi dejjem l-istess ħaġa ħa tispiċċa tibni. Le, taħraq trid — tagħti n-nar u tibda mill-ġdid. Għamilt naqra mqarrun u qarabagħli l-forn.
27 ta’ Settembru 2022
Qiegħda l-ajruport ta’ Madrid; grandjuż. Fi triqti biex inżur ’il Clara u xi ħbieb oħra. Biljana ġa qiegħda hemm, Erin ħa tasal mill-Kanada, u Catarina ħa ssuq mill-Portugall. Lestejt il-ktieb dwar films offensivi. Huwa disturbanti u jbiddilli l-perċezzjoni tiegħi dwar films tal-biża’ u B-movies.
Qed naħseb dwar xiex inhi l-performance, Leaking Bodies. Kif iżżommha msaħħra l-udjenza, fi spazju ta’ kontemplazzjoni, dil-performance? X’mistoqsijiet għandhom jiġu mistoqsija? Il-bidu idilliku — morbidu, kuluri tal-pastell, roża u blu, unikorni, dik l-estetika ekofemminista li qed insib madwar il-kotba li qed naqra. Imbagħad nisa ta’ mezza età (ma jinteressawnix performers żgħar ħafna) jibdew jagħmlu azzjonijiet performattivi fuq iġsma-blalen u fuq xulxin. Bil-mod, l-iġsma kollha animati u mhux jibdew jerħu likwidi ħodor-kannella-ħomor skuri. Trid tidher qisha orġa-massakru; hemm il-vjolenza, u hemm is-saħħa. Bħal meta jiġini l-period; straġi, uġigħ, imma jtini l-ħajja. Inħossni b’saħħti.
3 ta’ Ottubru 2022
Qiegħda fuq il-ferrovija minn Zamora għal Madrid. Merkurju dirett. Bdiet fażi ġdida għalija tal-Ass tax-Xwabel — Erin qratli l-karti tax-xorti. Eċitata, kurjuża u ansjuża, ħerqana għal dan il-kapitlu l-ġdid.
Dis-safra wkoll ġabitni f’tiegħi u sostnietni! Kienet veru tajba! Il-ħbiberiji mitqlu deheb. Kemm huma neċessarji u importanti. Qisni ħadt banju sustanzjuż fil-ħalib u l-għasel.
Indunajt b’ħafna affarijiet waqt din is-safra.
Ħafna affarijiet u realizzazzjonijiet dwar l-Ukrajna: ir-relazzjoni tiegħi magħha hija mwaħħla fil-parti tal-identità tiegħi li għadha tifla, u għandi bżonn nemanċipaha lil dit-tifla. Inħossni skomda u insikura meta jkolli nitkellem dwar il-politika, il-gwerra u l-Ukrajna u m’għandix pożizzjoni artikolata sew, opinjoni maħsuba fil-fond li lesta nipproteġi u niddefendi; inħossni immatura. Ma nafx nirrakkonta l-istorja Ukrena li tfisser xi ħaġa. Ma nafx lili nnifsi biżżejjed dwarha; jien prodott tal-istat kolonizzat. Kif nista’ nispjega s-Sič ta’ Zaporižžja u l-Kosakki?!
Kelli ħolma vera kerha l-lejl li għadda. Gwerra fl-eqqel tagħha, rokits fis-sema, u suldati. Kont man-nanna, li għadha Odesa bħalissa. Xi ħadd tana biċċa niedja — “biex inkunu nistgħu nieħdu n-nifs” bejn it-terrapien u l-partiċelli li jtiru fl-arja wara l-isplużjonijiet. Sħabi Clara G.-F. u Liza D. salvawna billi ħbewna f’taksi.
Ħerqana għaż-żmien li ġej. Għandi mnejn ikolli bżonn inrawwem naqra patrijottiżmu Ukren. Forsi minn hemm tibda d-dekolonizzazzjoni tiegħi nnifsi u l-emanċipazzjoni.
4 ta’ Ottubru 2022
L-ewwel ġurnata minn 96 (16 x 6)
Ma bdejtx bit-tajjeb. Ħadt triq kompletament b’oħra. Intlift.Mingħajr ma ridt, jien u nittraduċi bdejt niftakar fejn kont jien fil-ġranet li ssemmi Ira fid-djarju. Fl-4 ta’ Ottubru 2022, pereżempju, għalaqt 23 sena. Kont għadni nibda naħdem l-università u kelli frenza dritta qasira; dakinhar kont ġbidt xagħri ’l fuq. Kienet għadha s-sħana għal Ottubru; kont bil-komma qasira. Konna morna għand ommi filgħaxija u meta fittixt ritratt minn dakinhar ħadt qatgħa. Dirgħajja għadma u ġilda. Indunajt kemm kont ma niflaħx, kemm sirt iktar b’saħħti dan l-aħħar, kemm għaddejt minn affarijiet u kemm għadda żmien minn dakinhar, u fl-istess ħin, kemm jaf ikun kwiet u kalm il-mard u l-uġigħ waqt li l-ħajja ta’ kuljum tkompli ċċekċek. Ħassejt sens ta’ paċi. Traffiku ta’ filgħodu; roti waħda f’waħda ma jċedulix. Ridt nibki, naħrab xi mkien. Meta wasalt, fl-aħħar, waħda mill-affarijiet li għamilt f’dil-ġurnata fejn suppost nidra kollox kienet li nidħol għal interview ta’ kollega ġdid. Lil dan il-kollega prospettiv, xjenzat mill-Iżlanda, staqsejtu mistoqsija, “Għala hawn? Għala tixtieq taħdem f’bank tad-demm?” U kważi nfaqa’ jibki. Ħassejtni żibel, li ma kontx qed inkun ta’ appoġġ għal xi ħadd qed iħossu vulnerabbli waqt interview. Mhux apposta. Mid-dehra għandu xi storja fil-familja li għandha x’taqsam mat-trasfużjoni tad-demm.
Hemm ħafna pressjoni fl-arja.
Qed insibha diffiċli li jkolli nitkellem bl-Olandiż.
Kont qed naqra fuq “is-sigurtà fuq il-post tax-xogħol”, fuq il-perikli li jkun hemm twaqqigħ tad-demm. Kemm hu potenti dal-likwidu bijoloġiku! U dal-post hawnhekk hu kollu dwar fruntieri, kontroll, konteniment. Fruntieri li d-demm ma jistax jaqsam.
Għedt lili nnifsi li ħa naħdem hawn għal 96 ġurnata — erbat ijiem fil-ġimgħa, erba’ ġimgħat fix-xahar, għal sitt xhur. Ħa nikteb hawn kuljum.
Għandi l-ħanek ftit iffjammat. Is-sistema immunitarja baxxa.
Il-ħarifa. Wasal iż-żmien għall-vitamina Ċ.
5 ta’ Ottubru 2022
It-tieni ġurnata minn 96
Bdejt bl-għaraq. Naqra ’l bogħod bir-rota. U r-riħ kien kontrija. L-ikla tiegħi ta’ nofsinhar ġiet osservata u analizzata. Stħajt niekol il-ħobż iqattar biż-żejt.
Tgħallimt dwar il-protokoll ISO15189 għal-laboratorji mediċi. Missejt id-demm! Regoli, regoli, regoli. Ħafna regoli. Daħħalt ma nafx kemm-il kampjun. U Radha (l-istil ta’ xagħarha impressjonanti, miġbud ’il fuq) urietni kif nittrasferixxi d-demm mill-kunjett tal-isptardin kienet “mother vial” fl-oriġinal għall-kunjett tal-laboratorju. It-trabi ftit li xejn għandhom plażma; qatra żgħira biss.
Rajt ukoll il-protokoll li juri liem materjal jittieħed għal liem analiżi: meta jintuża s-serum, meta jintuża d-demm sħiħ biċ-ċelloli ħomor, meta jiġi miżjud l-EDTA, eċċ. Wieħed mill-għanijiet tiegħi għala qiegħda hawn huwa biex nipprova nara kif tista’ toħloq kit DIY biex tanalizza l-ormoni d-dar, speċjalment it-testosteron, l-estroġen u l-proġesteron. Għalissa, għadni ma sibtx informazzjoni jew testijiet relevanti. Nissuspetta li ħa tkun waħda mill-ELISAjiet.
6 ta’ Ottubru 2022
It-tielet ġurnata minn 96
Il-magni bijofiżjoloġiċi għandhom ir-rieda tagħhom?
Kont qed nisma’ ’l Anne Baring. Tkellmet dwar l-Ukrajna u Malta fl-istess lekċer! Kienet qed titkellem dwar kultura preistorika tan-Neolitiku fix-Xlokk tal-Ewropa tal-Qedem u l-Mediterran (l-Ungerija, ir-Rumanija, il-Bulgarija, il-Moldova, l-Awstrija tal-Lvant, il-Polonja tan-Nofsinhar, l-Italja, il-Greċja, il-gżejjer tal-Eġew, parti mit-Turkija, l-Ukrajna u Malta). Tkellmet dwar il-gwerra minn perspettiva spiritwali. Kienet xi ħaġa straordinarja għalija li ż-żewġ pajjiżi li nsejħilhom dari ssemmew f’daqqa f’teorija, f’ipoteżi. Rari jissemmew fl-istess sentenza l-Ukrajna u Malta. Kull darba li nispjega l-ġeografija personali tiegħi, ikolli nirrimarka li hija tagħqida pjuttost partikolari ta’ postijiet.
Kif nista’ nġib-naħseb-nattiva stat ta’ ħajja sagru, spiritwali u iktar-minn-uman f’bank tad-demm? (Jane Bennett tkun diżappuntata li tfajt “spiritwali” u “iktar-minn-uman” fl-istess sentenza, ħeħe)
Xogħli kien tedjanti llum…
U li kieku d-demm għandu kuxjenza?
Qbiżt laqgħa tax-xjenzati li kelli nattendi. Minflok, mort mixja twila f’Hondenpark, il-park tal-klieb.
Il-kampjuni tad-demm huma mostri! Il-kelma għal “kampjuni” bl-Olandiż tiġi “monsters”.Bil-Malti kampjuni tad-drapp ngħidulhom mostri.
7 ta’ Ottubru 2022
Ir-raba’ ġurnata minn 96
Inħobbu nhar ta’ Ġimgħa. Mort bir-rota. Domt inqas mis-soltu, għal xi raġuni 35 minuta. Forsi llum ir-riħ kien favurija. Sirt naf li Yvonne tippjana x-xogħol fid-dipartiment ukoll. L-isbaħ parti tal-ġurnata tiegħi kienet laqgħa ma’ Kyra, kors intensiv fir-risponsi immunitarji kaskati, u l-ewwel biċċa xogħol ta’ veru li tawni. Ħa nitgħallem nagħmel it-test tan-nefelometrija, u ELISA. Togħġobni l-idea li nitgħallem ħiliet ġodda, jistimulawni ħafna. Onestament vera eċitanti li qed immiss il-kampjuni tad-demm u nitgħallem affarijiet ġodda.
“L-ekoloġija kumplessa tal-ġisem uman tagħmel neċessarju li nifhmu x’jiġifieri tkun komunitajiet b’diversi speċijiet.” — Sex Ecologies, p.65.
9 ta’ Ottubru 2022
Ħolma Taħt Qamar Kwinta (Wott). Għomt — proprjament niżżilni raġel fl-ilma bil-ħwejjeġ b’kollox — fl-ilma baxx imma ċar tal-Baħar l-Iswed. Tfuliti, żgur. Il-verżjoni adulta tiegħi żaret lil tfuliti. Odesa, l-Ukrajna. Dak il-baħar li nafu sew. Ir-raġel kien il-maħbub tiegħi, konna qed nitbewsu, żammni waqt li ntlaqt f’wiċċ l-ilma u xxarrbuli ħwejġi u l-ġilda. Kien mument sabiħ, ta’ wens u speċjali fil-ħolma. Ma niftakrux wiċċu. Kellu libsa u tip ta’ hoodie. Kien hemm xi ħaġa bid-demm — qatgħa, forsi fuq idi — id-demm kien qed jinġabar imma mingħajr ma jnixxi, u hu niggiżha, u beda ħiereġ. Kont qed nibża’, imma meta beda ħiereġ id-demm ħassejtu mument ta’ paċi u liberazzjoni, ma kien tal-biża’ xejn. Ma tantx ħareġ demm, nixxija żgħira u kalma biss. Naħseb qabel kien hemm xi dar u ġraw xi affarijiet oħra, imma ma tantx nista’ niftakarha dik il-parti tal-ħolma.
11 ta’ Ottubru 2022
Il-ħames ġurnata minn 96
Illum tgħallimt kif nuża l-Atellica. Ħadt gost. Ġurnata mimlija. Jogħġbuni l-ġranet mimlijin; inqas ħin niddubita lili nnifsi. L-Atellica huwa tip ta’ tagħmir robotiku li janalizza d-demm.
Il-lavranti bnedmin tal-laboratorju jservu lir-robot biex ikun jista’ jaħdem.
Waranofsinhar, kellna laqgħa tax-xjenzati. Ma nifhem xejn f’dawn il-laqgħat tax-xjenzati. Jgħidu kollox f’tip ta’ “lingwa-kodiċi”. Nieħu gost nagħmel ħarsa intelliġenti fuq wiċċi meta fil-verità nkun qed naħseb li dil-laqgħa kollha hija xi tip ta’ grada elaborata biex lilna jibqgħu jżommuna fuq barra.
Għaddejt mill-grada, b’xi mod.
17 ta’ Ottubru 2022
Id-disa’ ġurnata minn 96
Ir-rutina tedjanti. Inħossni griża. Iż-żerniq kien spettakolari! Dalgħodu rġajt mort bil-metrò; illum mexa kollox sew. Bil-mod qed nitjieb fl-“overschenken” [it-trasferiment tad-demm], u fil-kompiti ta’ wara — l-immaniġġjar tal-kampjuni li nirċievi u d-dokumentazzjoni tagħhom. Id-demm fih innifsu għadu daqsxejn tal-biża’. Qed naqra artiklu dwar id-demm u l-prossimità mal-viruses; dan l-awtur qed jikteb speċifikament fuq l-Epatite Ċ.
Jimmy qalli li qara dwar il-mostri tal-baħar — togħġobni ħafna li kemm id-demm u kemm il-baħar għandhom il-mostri tagħhom!
18 ta’ Ottubru 2022
L-għaxar ġurnata minn 96
Illum kienet ġurnata intensa. Ħafna laqgħat. Kull darba li ninzerta lil Kyra (ta’ fuqi) u ttini x-xogħol, nitferfex. Għala dir-reazzjoni ta’ biża’? Kull darba li naraha qisni qed ngħum fl-awra tal-istress tagħha. Mhijiex persuna wisq chill, xjenzata kif tistennieha li tkun, ambizzjuża ħafna. U mara, jiġifieri wisq probabbli f’ħajjitha kellha tagħti iktar prova tal-kapaċitajiet tagħha minn xjenzat raġel kwalunkwe.
Tatni biċċa xogħol x’nagħmel. Irrid nipprepara protokoll għaċ-ċikli tal-iffriżar u t-taħlil.“ittowjar”?… fil-kċina ma’ doris vibes! Faċli. Hemm spirtu ta’ kompetizzjoni u perfezzjoniżmu fl-arja. Ikolli nammetti li jittieħed.
Fil-laqgħa tal-bijoanaliżi, użaw ritratt tal-artropodi Lumilidae.“Horseshoe Crab” tiġi Granċ tan-Nagħal? Ivvintajtha jien din imma sabiħa naħseb. Ma stajtx insib traduzzjoni bil-Malti. Bit-Taljan “grancio reale”. Inkella bil-Latin, “Lumilidae”. Inzertajt dar-ritratt ftit ilu, jien u nirriċerka l-kuluri tad-demm ta’ annimali differenti, fl-istudio. Ix-xjenzat kien qed jgħid kif “annimali żgħar” (firien, ġrieden, fniek) għadhom jintużaw għar-riċerka dwar ir-reattoġeniċità.
Għaddieli l-ħsieb li r-riċerka ta’ Jimmy dwar in-nassaba qed tittratta affarijiet simili. Dawn in-nies “edukati u ta’ klassi ogħla” (ix-xjenzati) huma involuti sew f’dak li tista’ tqis bħala mġiba nonekoloġika. Imma meta din l-imġiba ġġib magħha wkoll profitti kbar, naħfrulha iktar malajr…
Eh! Innutajt ħaġa wkoll dwar l-iskala tar-robotika fil-laboratorji — kull proċedura analitika u teknika hija mekkanizzata, u r-robots jieħdu prijorità fuq il-prestazzjoni umana. Sibt website għall-bijoanaliżi tal-proġesteron, bħala parti mill-attentat tiegħi biex noħloq analiżi tal-ormoni DIY li n-nies jistgħu jagħmluha d-dar (tkun tista’ tgħin lin-nies trans jew lin-nisa cis biex iżommu kont tas-saħħa menstruwali tagħhom). Imma anke jekk niħħekkjaw il-kompożizzjoni tar-reaġenti — dawn jinħolqu għal magna speċifika. Jiġifieri rrid insib mod kif nimita manwalment dak li jagħmel robot.
Dawn huma n-noti u l-iskoperti tiegħi tal-lum:
Il-konferenza NVML — l-Assoċjazzjoni Olandiża tal-Impjegati fil-Laboratorji Bijomediċi
Id-demm tal-Lumilidae (LAL/TAL) — 15% mortalità
Sinerġija tat-test tal-endotossina. Reattoġeniċità
bio-rad-antibodies.com
Riċevitur tal-proġesteron = PGR
Immunokumpless IgG = tip ta’ antikorpi, ċelloli plażma B
ilexmedical.com (pdf) Robotika 🙁
Endokrinoloġija għal nies trans: genderclinic.nl
Ċentru mediku VU solutionclinic.nl
transunitedeurope.eu
transvisie.nl
stopgatekeeping.nl
19 ta’ Ottubru 2022
Il-ħdax-il ġurnata minn 96
Illum għajjiena u stressjata. Ma rqadtx tajjeb. Ħlomt b’JaHa. Kien qed jaqrali ktieb. Qed naħseb fuq il-perfezzjoniżmu u l-vibe kompetittiva — “kun l-aqwa” — fuq ix-xogħol. Kyra tbeżżagħni, jew forsi s-sindromu tiegħi tal-aħjar studenta tal-klassi. Ġurnata orribbli oħra fl-Ukrajna, massakru .
