Ftit iktar minn sena ilu ppubblikajna l-ewwel parti ta’ “Es Sidr”, sensiela ta’ esejs li fihom Omar N’Shea jibda jgħaqqad l-istorja ta’ ommu u Otman permezz ta’ file mimli ittri miktubin bl-idejn mibgħuta mil-Libja, li ħallietlu ommu wara mewtha. Donnha kienet ħallithulu apposta biex isibu. Dan ix-xahar qegħdin nippubblikaw l-aħħar parti ta’ din is-sensiela, u nistgħu naraw kif fetħet l-istorja biex tkopri mhux biss ir-relazzjoni ta’ tnejn min-nies, iżda ta’ żewġ pajjiżi, u d-destin ta’ dawk li ġew hawn u ta’ dawk li marru hemm. Ta’ dawk li baqgħu u ta’ dawk li telqu. Fi sħabu Libjani, Omar jara kif setgħet żvolġiet ħajtu li kieku ommu kienet qrathom mod ieħor dawk l-ittri li ħallietlu. Kif ħajjitha, u ħajtu, kienu fil-fatt qari wieħed partikolari ta’ dawk l-ittri. U ħallithomlu biex ikun jista’ jagħmel qari ieħor minnhom. Xahrejn oħra se joħroġ Es Sidr bħala ktieb stampat, u b’hekk din l-istorja għal darba oħra se ssib ruħha bħala marki tal-linka fuq il-karta. Mill-bidu nett, dejjem għedna li għalina l-pubblikazzjoni online hija opportunità kbira sabiex nagħmlu x-xogħol tal-kittieba tagħna kemm jista’ jkun disponibbli u aċċessibbli għal kulħadd u l-ġurnal innifsu sostenibbli. Fl-istess ħin, dejjem emminna li l-ktieb stampat jagħti aċċessibbiltà ta’ tip differenti lil qarrejja oħrajn fuq skala oħra ta’ żmien. Ukoll, jagħmel lil Aphroconfuso, bħala proġett editorjali mhux għall-profitt u mmexxi mill-kittieba, sostenibbli fit-tul. Es Sidr huwa t-tielet ktieb ta’ Aphroconfuso u se jitnieda biss ftit jiem qabel Antoloġija 2, li huwa r-raba’ ktieb tagħna. Is-sena l-oħra, b’Antoloġija 1 wettaqna għall-ewwel darba l-vjaġġ sħiħ tal-kitba tagħna minn pubblikazzjoni online, għal pubblikazzjoni awdjo, għal pubblikazzjoni stampata. B’Qarn rajna idea li bdiet online u tkompliet fi ktieb. B’Es Sidr naraw xogħol li għandu ħajja fit-totalità tagħha fil-paġni tal-ġurnal online, u issa bħala ktieb stampat. L-ebda wieħed minn dawn il-vjaġġi ma huma kompleti; kull inkarnazzjoni ġdida tal-kitba dejjem hija bidu, qatt mhi tmiem. Il-kitba tibqa’ tgħix u tkanġi hekk kif jinbidel il-mezz; tibqa’ taħdem fuqna b’mod dejjem ftit differenti, tgħallimna ngħixu u tħarbtilna ħajjitna. Għax ħajjitna tiżvolġi mhux biss skont dak li hu miktub, iżda wkoll skont kif naqrawh .
