nonfoħ fil-kustilji allużjonijiet ġodda

Inneħħi idi mill-pum tal-bieb tal-librerija u nibda ħiereġ. Dalgħodu ddeċidejt ma ngħaddix minn Hlavná: bir-riħa kannella tat-trdelník li teħel fi mnifsejja bħal misluta, il-passi ġentili jħabbtu mal-bankina mużika misduda, il-funtana tiġġestikola b’lingwa għariba. Minflok, qtajtha li ngħaddi minn fejn qatt m’għaddejt qabel. Moyzesova tagħtini l-impressjoni li se tkun l-isbaħ triq li ngħaddi minnha hawn. Hawn is-siġar, issa fjakki, waħda wara l-oħra tul dirgħajn it-triq merfugħa ’l fuq sal-punt fokali: ġgajta siġar isefsfu konfoffa xi żewġ kilometri ’l hemm. Hawn munzell weraq kafellatte lest għall-pala. Daqt jiġu l-ħaddiema jarmuh għax ma jafux li l-weraq mejjet jgħajjex l-art. Mirdum fil-miżbla l-weraq jistenna fidwa li ma tasal qatt. Immur fuq il-munzell u nċafċaf fih, it-tgħaffiġ tiegħu komdu taħt ġismi katavru. Għad inkebbeb dal-ġisem inutli fetu f’dil-bejta mħadda, ninżel bla lġiem fil-fond ta’ raqda twila. Nibqa’ miexi. Tfajla bi skufja sepja tgħidli xi ħaġa bl-Islovakk u tinstema’ stramba għax qed titbissem. Minn “krásny” u l-mossi tagħha naqtagħha li qed tikkumplimentali t-tibdila. Tgħidli kemm għandu materjal sabiħ il-qalziet: satin ċelest jasal sad-daħla ftit ’l isfel minn sidri bejn il-kustilji inferjuri u qaddi. Dalgħodu fil-mera ammirajt is-sura żnella tal-addome titwessa’ delikatament f’ġenbi. Tistaqsini minn fejn jien u x’qed nagħmel hawn. Is-simpatija tal-parlata tinġabar taħt iċ-ċinta tal-qalziet u tiftaħli ġenbi ftit iżjed u nitbissem. Tistaqsini jekk nemminx b’Ġesù Kristu imma l-kumplimenti kumplimenti jibqgħu, jiġu mingħand min jiġu. Ngħidilha li Ġesù Kristu żelaq min-nifs li nieħu bħad-dijossidu tal-karbonju u ma nafx għadx jerġa’ jidħol. Tgħidli li Alla nefaħ fil-kustilji t’Adam u ħoloq lill-mara u nħossha tifhimni. Nistaqsiha xi knisja tattendi u tgħidli li hi Mormona. Naqbdu nidħqu bil-ġuvintur bil-qomos bojod u l-qliezet suwed li żgur mhumiex tas-satin iċemplu l-qniepen tan-nies biex iwasslulhom lil Ġesù Kristu. Tgħidli li forsi tliftu għax ma sibtx komunità u ngħidilha li mhux għalhekk imma nkun qed nigdeb. Bejn dak iż-żmien li tliftu u issa għebitli l-komunità u forsi għalhekk ma reġax tfaċċa biex jonfoħli fil-kustilji. Tistedinni għaċ-ċelebrazzjoni ta’ nhar il-Ħadd u tagħtini l-Ktieb ta’ Mormon. Naħsbu l-Bibbja u neċita ruħi għax nixtieq waħda fiżika biex nislet l-allużjonijiet minnha jien u nikteb. Imma bil-Ktieb ta’ Mormon nista’ nislet allużjonijiet ġodda u issa naraw x’joħroġ. Forsi xejn. Forsi qed nikkontempla bis-serjetà mmurx għal-laqgħa tal-Ħadd. Teħodli b’idi u xxejjirli. Bil-Ktieb ta’ Mormon f’idejja nitlibbes ħwejjeġ indaf: qmis bajda u qalziet iswed. Inkompli miexi. Dit-triq qed tkompli tisbieħ. Issa hawn l-università: il-Fakultà tal-Filosofija, id-daħla ewlenija u l-Fakultà ta’ Xi-Ħaġa-li-ma-Nifhimx. Il-bricks ħomor, sofor u ħodor jagħtuhom xeħta iktar statali u għal mument nibża’ nidħol bħallikieku student ġdid. Il-katidral fuq in-naħa l-oħra jidher ikbar mis-soltu avolja hemm triq twila bejnietna. Hemm bini b’roqgħa ħaxix pulit quddiemu. It-triq nistħajjilha qed ittajjarli l-paġni ta’ kotba li qatt m’għarrixt u ġismi jeħfief bl-għerf li qed jikkonċentrani f’daqqa. Għaddejjin żewġ sorijiet jirgħaw xi għoxrin tifla. Immur fuqhom u nistaqsihom jemmnux b’Ġesù Kristu waqt li ndeffsilhom il-Ktieb ta’ Mormon f’wiċċhom. Iħarsu lejja mqiti u jibqgħu sejrin. Imma waħda minnhom tħares lura b’xufftejha miġbudin daqslikieku setgħet ittegħemli nifsi u għoġobha. Quddiem il-ħanut tal-piercing nikkonsla għax għad li ma nistax nimmortalizza lil J bil-bews u t-tgħanniq jesgħu ħajja u nofs, qed nagħtih il-ħajja bil-poeżiji jnixxu mill-pjagi mħaffra fl-ispazju ta’ bejn daż-żewġ iġsma. Nidħol bil-Ktieb ta’ Mormon f’idi u nidħaq. Irrid indaħħal żewġ ħoloq f’widnejja biex niġi naqbel mal-ispirazzjoni li ħadt minn Twitter, minn tant postijiet. Mullet, mustaċċi rqaq imma solidi u ħoloq f’widnejja, u b’hekk, inkompli nonfoħ fil-kustilji ta’ deċennju mbiegħed. Meta ninża’ l-hoodie nilmaħ il-flokk navy blue b’catholic life and leadership miktuba fuqu u nogħxa. Il-flokk li ġibt minn konferenza l-Amerka fuq il-Ġenesi, meta jien u E ta’ xagħru kubrit miġbur f’qagħqa smajna mis-serp jissupplika fil-vibrazzjonijiet tal-mikrofonu u morna nivvendikawh wara t-tabernaklu, E siequ mgħollija fuq il-bankuni tal-kor u jien inserraħ il-piż kollu tiegħi fuq dahru zokk ta’ siġra xiħa. Il-ħaddiema tibda tgħannaqni u tispjegali x’se jiġri. L-aħħar darba li ġejt ridt nibki minħabba l-uġigħ jinbaram man-nervituri. Hi u tagħfasli widinti ngħidilha dwar it-tattoo ta’ J, dik li ġejt miegħu hawn biex jagħmilha, u kemm xtaqt naqbadlu idu biex ma jweġġax. L-apparat inħossu jissikka u l-muskoli ta’ sidri u l-kustilji jogħlew b’ħasda, bħallikieku wasal il-ħin li ruħi u ġismi jinfirdu għall-ħajja ta’ dejjem. Għandi ħruq bati fil-ġerħa li jibda jiskot gradwalment. Did-darba ma joħroġx demm. Nerġa’ mmur il-librerija, il-ktieb għadu jitħaxken mal-ġenb ta’ sidri. Naħsibha niktibx dan kollu jew naqrax il-ktieb. Nibda nikteb. Il-ħruq għoddu sparixxa .