isbn 978-9918-0-1063-9, 192 paġna.
Qarn huwa memoir ta’ transizzjoni, esej ta’ protesta, manifest poetiku, strateġija utopika, ittra ta’ mħabba. Romeo Roxman Gatt jiġi lura Malta għal żjara qasira, iżda aħbar ħażina ma tħallihx jitlaq lura Londra. Minflok, jibda vjaġġ ferm aktar impenjattiv, wieħed li minn dejjem kien jaf li xi darba għad ikollu jagħmel. Qarn huwa l-istorja tar-ritorn tiegħu lejn id-dar, il-lingwa u l-familja tiegħu, li jsir ukoll ir-ritorn lejh innifsu.
Biex tordna dal-ktieb u tiġbru waqt it-tnedija, ibgħat €18 lil revolut.me/aphroconfuso. Jekk m’għandekx Revolut, il-link tippermettilek li tħallas bil-card tiegħek.
« Ta’ sittax-il sena nħlist mis-saħta tal-eteronormattività. In-nisa dejjem għoġbuni u ammirajthom u dejjem rajthom interessanti ħafna, iktar minn, pereżempju, bosta mill-irġiel cishet. Imma xi vuċi ġewwa fija minn dejjem qaltli li mara jien m’iniex. U allura ridt nara xi stajt nagħmel biex it-tifel li dejjem kont, insir. Il-kotba għallmuni ħafna, sirt naf nużahom sew, avolja iktar tard f’ħajti. Il-vjaġġ li nibda nsir naf lili nnifsi beda ta’ għoxrin sena, eżatt kif tlaqt minn hawn Malta. Minn baħħ ta’ kliem u geġwiġija ġo moħħi għal ħafna kliem u geġwiġija ġo moħħi, ikkurati b’attenzjoni u ħafna ħin, imma qatt biżżejjed. F’relazzjoni, fil-kċina jew fis-sodda dejjem “hu” kont, fil-kartolini tal-Milied prinċep, qatt prinċipessa. U lanqas prinċipessi għax għaxar snin ilu, għalkemm kont ġa qiegħed Londra, pronomi fil-plural kont għadni ma nafx dwarhom u lanqas il-kelma “trans” ma kont bdejt nidħol fiha wisq. It-tfajla li kont noħroġ magħha kienet qed tagħmel it-teżi tagħha dwar in-nuqqas ta’ konnessjoni bejn it-trattament tal-NHS u t-teorija transfemminista. Tiegħi kienet dwar x’jitqies “normali” u x’le. Mhux ħa nidħol wisq fihom. Ma kellix ħsieb nikteb test fit-tul. Wara l-O-levels bil-Malti qatt m’erġajt ktibt. Għarukaża naf, iżda ħassejtni iktar komdu nesprimi ruħi fil-fond bl-Ingliż u bit-tpinġija. Is-sess, l-identità u dak kollu li hu queer kelli kliem għalih bl-Ingliż biss, daqslikieku l-lingwa Ingliża, kif ukoll it-tpinġija kemm fuq il-karti kemm fuq ġismi, kienu jgħinuni ninħeles mill-mistħija u l-istramberija li l-ilsien Malti kien jinfilsa fija. Bħallikieku kont inħossni persuna oħra Londra. Kont iktar liberu u ftit imbiegħed mill-biża’ li mlietni bih ir-reliġjon Kattolika. Għalkemm qisni ħrabt lejn Londra, xorta waħda kont bqajt taħt l-influwenza ħażina tagħha. Waħda mill-akbar problemi kienet is-sess — u mhux ovvja jekk dan is-suġġett aħna l-Maltin għadna s’issa nqisuh tabù? ’Qas nilħqu naħxu u ninħabbu, ninħabbu u naħxu li ma kontx tarani nwaddab il-lożor ġol-magna tal-ħasil u lili fix-shower. Minbarra dan kelli wkoll disforja kbira imma ma kellix idea kif nindirizzaha ħlief billi nkompli nkun kemxejn stramb ma’ min iħobbni u jrid jifhimni. Lanqas kont għadni naf li hekk kelli, jew li hekk jgħidulha. »
Tista’ taqra u tisma’ silta itwal minn Qarn ippubblikata f’dan il-ġurnal fl-1 ta’ Mejju 2023.
It-tnedija ta’ Qarn, ta’ Romeo Roxman Gatt, pubblikazzjoni Aphroconfuso, se ssir fit-22 ta’ Marzu 2025 f’Rosa Kwir Ħal-Balzan fis-7.30pm. It-tnedija se ssir b’kollaborazzjoni ma’ An Intimate Affair.
