Il-Mara tas-Suldat

ABT

Ċerti maħbubin jitħalltu b’mod intelliġenti. Pereżempju, fix-xemx sajfija abtejhom ifuħu bħall-bżar jew il-misk. Fix-xitwa l-maħbubin jimmodifikaw il-perspirazzjoni b’tali mod li l-fwieħa tagħhom tinbidel kompletament. Dan jissejjaħ “l-ilbies tal-fwieħa tax-xitwa”. L-aktar bidla sensittiva sseħħ fl-abtejn. Meta l-maħbubin tat-Tribù taċ-Ċinturini (il-Pajjiż il-Kbir, l-Ewwel Kontinent, iż-Żmien Glorjuż) jilbsu l-fwieħa tax-xitwa, jagħmlu dan b’mod immakulat. Imma ma jistgħux jgħidu kif jirnexxilhom.

AĦNA 

Ara Attribuzzjoni

ALFABETT

L-alfabett t’hawnhekk ħolqitu Karmenta. Qabilha, Tetis kienet twieldet mill-baħar biex tgħallem alfabettiżmu ieħor. Kali wkoll ivvintat alfabett, magħmul minn ħamsin simbolu. Kull wieħed minn dawn is-simboli jidher fuq ix-xbieha tagħha, irrappreżentat mill-irjus tal-iskeletri fuq il-ġiżirana ma’ għonqha.

AMAZZUNI

Fil-bidu, jekk qatt kien hemm bidu, il-maħbubin kollha sejħu lilhom infushom amazzuni. Huma u jgħixu flimkien, jinħabbu, jiċċelebraw lilhom infushom, jilagħbu, fiż-żmien meta x-xogħol kien għadu logħba, il-maħbubin fil-ġnien tal-art baqgħu jsejħu lilhom infushom amazzuni tul Żmien id-Deheb kollu. Imbagħad, xħin twaqqfu l-ewwel bliet, bosta maħbubin kissru l-armonija oriġinali u sejħu lilhom infushom ommijiet. Minn dan iż-żmien ’l hemm, il-kelma amazzuna saret tfisser għalihom tifla, li qatt ma tikber, immatura, dik li qatt ma tħaddan id-destin tagħha. L-amazzuni tkeċċew mill-bliet tal-ommijiet. Kien f’dak il-mument li dawn saru vjolenti u bdew jiġġieldu biex jiddefendu l-armonija. Għalihom, l-isem antik amazzuni baqa’ bit-tifsira oriġinali. U minn issa beda jfisser xi ħaġa aktar: dawk li jħarsu l-armonija. Minn hemm ’il quddiem stajt issib amazzuni f’kull żmien, f’kull kontinent, gżira u xatt. Dħalna fiż-Żmien Glorjuż grazzi għall-amazzuni tal-lum. (Ara Dubji 1.)

ANNIMAL

Ħafna drabi maħbuba tuża ġesti biex b’ġisimha ssir tixbah dak l-annimal jew dawk l-annimali li l-aktar li għandha affinità magħhom u b’hekk tagħti pjaċir lill-maħbuba tagħha. Dan isir aktar faċli meta tkun taħt ipnożi. Trid tinsa l-mossi ta’ kuljum u ssib dawk tal-annimali tagħha. Din mhix imitazzjoni tal-annimalesk: din hija mima. Hija ħaġa diffiċli biex taqbad u tagħmilha spirtu pront, anki jekk il-maħbuba ssaqsiha biex tagħmilhielha bl-ikbar ġentilezza. “Meta ssaqsini biex nagħmilha ta’ ġemel, niddejjaq, għax rari jirnexxili.” (Charlotte Plume, Iċ-Ċirku Tiegħi, Gallija, Żmien il-Konkos.)

ATTIVISTA

Ara Wittig

ATTRIBUZZJONI

Jien_a huwa l-isem kollettiv li għażilna għal dal-proġett. Jien_a huma Daniel Cossai, Leanne Ellul, Noah Fabri, Charlene Galea, Miriam Galea, Joe Gatt, Matthew Schembri u Loranne Vella. Iddiskutejna l-possibbiltà li nissemmew kollha kull fejn jidher awtur għal dan ix-xogħol imma fl-aħħar iddeċidejna li nippreferu nużaw isem ad hoc, li ħareġ waqt il-kitba ta’ risposta lil Monique Wittig.

BEŻŻUL

Il-beżżul jinsab f’tarf is-sider, ippuntat, maħruġ ’il barra, imqabbeż. Il-beżżul xortih tajba li jaffronta kull tip ta’ qilla. Jiflaħ għal kull xorta ta’ mard, anki meta jimrad. Fiż-Żmien Glorjuż, is-sider kellu x-xorti li jkun indurat bid-deheb u l-beżżul bħal ċirasa fuq kejk. Ħadd ma jaf il-għala sidrejn qatt ma qabdet art. Biżlejn tingħad u tingħadd mingħajr ebda diffikultà. Il-frażi l-aktar popolari fl-Era tal-Fwar, li llum il-ġurnata ntilfet, kienet: beżżilni ħa nbeżżlek. It-tifsira tagħha tinbidel f’kull każ.

BUŻŻIEQA

Hemm kemm-il mod biex naslu ħdejk. Ir-rota għadna ma tgħallimniex insuquha. Tal-linja ma tiġi qatt. Dirgħajna għajew jgħumu. Niddendlu ma’ bużżieqa u ntiru bħal tal-films. Bużżiqet l-arja. Bħallikieku għadna ħerġin mill-Era tal-Fwar. Hemm tant tipi ta’ bżieżaq differenti. Jien_a waħda minnhom. Nibku kull xahar, nibku għax-xagħar, nibku għax nibku. Kemm inti bużżieqa. Nużaw ballun tal-arja? Hekk isejħulu. Jekk induru d-dinja tmenin darba naslu? Kien hemm żmien li, kieku użajna ballun tal-arja, konna nużaw ukoll kappell, fjuri, frott, perlini, fwejjaħ u karti kull kulur. Kollha jtuk pjaċir, anki jekk differenti. In-nies kienu jħarsu bħalma jagħmlu darba kull darba. Meta ninqatgħu mill-arja jifirħu; dik id-darba, ma konniex inkunu nqtajna minn ġewwa. Konna nkunu rbaħna turnew minn ġew.

ĊIPRINA

Fejn jiżloq il-pjaċir. (Ara iNdewwa.)

DATI

L-ewwel laqgħa bejn Aphroconfuso u Librerija Geġwiġija dwar dan il-proġett saret fit-22 ta’ Mejju 2023. Is-sensiela ta’ workshops — bit-titlu “Noti għal dizzjunarju tal-maħbubin” — ħabbarnieha fl-4 ta’ Settembru 2023. Kellna workshops online ta’ sagħtejn il-wieħed nhar is-Sibt 9 ta’ Settembru u l-Ħadd l-1 ta’ Ottubru. Imbagħad, fit-28 ta’ Ottubru ltqajna l-Ġugar, Triq ir-Repubblika, il-Belt. Ir-raba’ u l-aħħar workshop sar online s-Sibt 13 ta’ Jannar 2024 u kien twil sagħtejn.

DEMM TA’ KULL QAMAR

Demm li jkebbeb kull wild u li sawwar l-ewwel kalendarju. Jinħass regolarment mill-mara f’ġisimha. Jidher u jissemma fil-pubbliku mingħajr ħabi u mistħija. (Ara Qamar.)

DIŻFEMIŻMI

Kliem espliċitu li nużaw apposta biex ma nċedux għall-iskrupli dwar ġisimna.

DUBJI

1. ~ rigward l-Amazzuni Minkejja li l-importanza tal-lingwa fl-istorja femminili laqtitni ħafna f’din l-entrata, naħseb ukoll li din l-entrata hija kemxejn problematika. Għalija ma jgħinx li timmaġina utopja fil-passat li qatt ma eżistiet. Fil-fatt, Wittig stess tibda billi tgħid li mhijiex ċerta jekk qatt kienx hemm żmien bħal dan. Personalment naħseb li l-fantasija f’dan il-każ ma tgħinx — huwa aktar importanti li nħarsu lejn l-istorja ta’ veru, l-istorja tal-ħajja ta’ kuljum tan-nisa u dawk kollha li jisplodu l-ġeneru, mirduma taħt il-pinna tal-irġiel, u ngħidu dik l-istorja, mhux nippruvaw noħolqu fantasija ta’ storja kanonika li tispiċċa tikkopja l-istorja tal-irġiel. 2. ~ rigward l-iskrupli Qed insibha iebsa nuża kliem bħal għoxx, sorm eċċ., għax trabbejt qatt ma ngħidhom, kif ukoll imdorrija nismagħhom biss użati b’mod vulgari u aggressiv, u b’hekk niddejjaq nużahom. Bejn irrid inneħħi t-tabù, u bejn forsi naturali wkoll li hemm ċerta privatezza madwar dawn is-suġġetti. Hemm raġuni wkoll għalfejn huma marbuta mal-“intimità”. Però, inħoss li dan it-tabù joħloq tant stress u ħsara li nixtieq inneħħih, imma qed insib lili nnifsi niċċensurani parzjalment permezz ta’ ewfemiżmi poetiċi bħal “hemm isfel”, “il-parti tiegħek”, “bejn saqajk”, “paċċu”, “pastizz”. Madankollu, biex nonora lil Wittig u navvanza l-femminiżmu lokali, sibt lili nnifsi nikteb prattikament soft porn bil-Malti, ġeneru li qatt ma interessani fih innifsu. Min jaf kieku dawn id-dubji nintegrahom fil-monologu intern f’moħħ il-protagonista? Flok it-termini litterali, forsi ser nikteb il-metafora sesswali minn lat femminili. 3. ~ rigward traċċi Għall-ewwel kelli ftit dubju fuq it-titlu tal-entrata [“Traċċi | Raġel”], billi l-ideat mhumiex marbuta speċifikament mal-kunċett ta’ raġel; f’dan il-proġett, “raġel” huwa kunċett wieħed minn ħafna fejn naraw l-ideat fil-prattika. Imma wara li ħsibt fuqha naħseb li fil-fatt ippruvajna mmorru għal żewġ titli — “traċċi” b’referenza għall-paragrafi u “raġel” b’referenza għall-vrus. Din ikkonvinċietni. Xejn xejn, il-preżenza ta’ entrata raġel qalb il-ħafna entrati l-oħra aktar marbuta mal-ġisem femminili turi kif sa ċertu punt qed nitbiegħdu minn Wittig biex “nittrasferixxu” l-ideat tagħha għall-politika tal-ġeneru tal-lum, li forsi tħares inqas speċifikament lejn il-mara milli kienet il-politika tal-passat, u iżjed tiffoka fuq l-identitajiet li ħloqna u kif dawn jaffettwawlna ħajjitna. 4. ~ rigward vaġina Indaħħlu l-ġrajja tal-Moviment Qawmien Vaġinali fl-Era tal-Fwar? Jien kieku nħassar l-entrata kollha.

FALDI

In-nisa tas-suldati minn dejjem kellhom, għax twieldu bihom. In-nisa l-mibnijin, is-sodi daqs blata ġo barriera, għandhom fuq li għandhom. Bis-saħħa tagħhom, falda saret tfisser ukoll “blata f’barriera bi trinka mħaffra madwarha” (Berengere, L-Istorja ta’ Sqaq, Etruria, iż-Żmien Glorjuż). Fit-trinka jidħlu l-ispnajjar — l-għodod għall-ponta li jaqtgħu l-iġbla. Fiż-Żmien Glorjuż, il-kelma kisbet sens ieħor. In-nisa tas-suldati kienu jieklu mhux ftit. Kull tip ta’ laħam tari. Kienu jħobbu jaħxuh b’laħam ieħor. U hekk falda kisbet sens ieħor, dak marbut mal-laħam. Dawk in-nisa li kellhom faldi żgħar kienu spiss jistħu u jinsatru taħt dik li b’assoċjazzjoni bdiet tissejjaħ faldetta, jiġifieri falda żgħira.

FOSSA

Il-quċċata (fid-dieher) tal-ħnejja.

ĠENERU

Ara Intraduċibbli.

ĠISEM, IL-

Ara Abt, Annimal, Beżżul, Bużżieqa, Ċiprina, Demm ta’ Kull Qamar, Faldi, Għar Ħasan, Ħlas, Ħnejja, iMxarrba, iNdewwa, Niedja, Oħla Deni, Ormoni, Qamar, Qawmien Vaġinali, Ras il-Beżżul, Skrupli.

GĦAR ĦASAN

Ġieha xi erbat ijiem ilu, u issa li wasal fl-aħħar kienet qed tħossha fuq ruħha. Ġieha d-demm ta’ kull qamar, l-ewwel tbajja’ mċajpra bilkemm jidhru, imbagħad qtajjar niexfa lewn it-tut li jċappsu l-ħwejjeġ ta’ taħt, u fl-aħħar gelgul magħqud inixxi minn bejn saqajha għal erbat ijiem sħaħ, sa ma jerġa’ jgħib fix-xejn bħalma ġie.

Kienet bilqiegħda ma’ Ed f’rokna mudlama tal-bar. Is-sufanijiet rotob lewn id-damask tal-festi bdew iħeddluha hi u tbennen f’idejha t-tazza tal-inbid. Barra kien hemm il-ksieħ, iżda hawn, fejn dejjem jiġu jtemmu l-lejla, kienu għall-irdoss. Kienet ilha barra mis-sebgħa. Wara x-xogħol kienet baqgħet sejra tiltaqa’ ma’ Ed. L-ewwel marru jieklu ġo restorant bl-imwejjed miksija dvalji bojod u l-frieket u s-skieken tal-fidda tqila. Għamlet sagħtejn tedha tħares lejh fuq in-naħa l-oħra tal-mejda, fid-dawl inemnem ta’ xemgħa bejniethom, hu u jitkellem fuq ħwejġu u jteftef fil-platt. ld-dawl tal-fjamma nebbiexa jiżfen fuq ġenb surtu, il-mewġa ħafifa ta’ ħuġbejh, għajnejh solenni, ħaddejh magħluba, geddumu mnaqqax, għonqu tiela’ bħal zokk mastizz minn nofs spallejh weqfin, u sidru miftuħ taħt il-buttuni ta’ qmis lewn is-sema bnazzi li tilmaħ hekk kif tintilef f’għajnejh.

Waqt li tpaxxiet b’din l-oħla tifkira u ħassitha xxurtjata li kienet biswitu, kompliet tiddendel ma’ dawk dirgħajh tal-franka. Trasset ma’ ġenbejh dojoq maqfulin biċ-ċintorin. Wara r-restorant kienu terrqu t-toroq, isserrpu qalb il-folla, il-mużika ttanbar, id-dwal jgħajtu u s-sirda tal-lejl. Għamu f’qiegħ grokk wara l-ieħor u spiċċaw jistkennu hawn, fil-post tas-soltu, filli jixxenglu u filli jistejqru, iserrħu fuq xulxin.

L-ilwien tal-bar iċċajpru, il-mużika tbiegħdet u ħassitha tegħreq ħelu ħelu ġos-sufan. Ġisimha tari, marsus bejn kuxxtejha, bħal donnha ħassitu jnemnem. Riġlejha kienu miksijin biss b’tights irqaq u dlonk bexxqithom taħt id-dublett wiesa’. Bdiet tħossha bejn tintelaq u bejn tqum. Sensazzjoni li biha bdiet kemm tieħu gost kif ukoll titħarbat, kemm issib lilha nnifisha kif ukoll tintilef.

Ed kien qed iħares f’qiegħ it-tazza. Għalkemm kien maġenbha, bħallikieku bejniethom kien hemm baħar jaqsam. Mixtieqa, bdiet tħoss bħal telqa u qawmien simultanji: partijiet ta’ ġisimha bdew jintelqu, bħal rasha, daharha u riġlejha, u oħrajn iqumu, bħal xufftejha, sidirha u… hemm isfel. Il-bar kien battal u din ir-rokna kienet minsija, moħbija wara kantuniera. Hi u tixħet rasha lura, bla ma riedet bdiet tbandal ġenbejha bħal donnhom kienu romblu, bħal donnu s-sufan kien għaġina li kellha tiftaħ biċ-ċaqliq tagħhom, ’il quddiem u lura, ’il quddiem u lura, tagħġen dejjem aktar fil-fond, titmewweġ, tirrombla, tiżżegleg sfrenata, sa ma fl-aħħar tiżloq fin-niedi. Tant titpaxxa kif tħoss dik in-nixxiegħa ċkejkna ċċarċar sħuna bejn saqajha, tinġabar f’għadira mbenna fid-daħla. Bil-mod, l-għoqda tinħall, tirtab bħal qagħqa mbilla u tiftaħ bħall-petali ta’ warda fir-rebbiegħa. Il-ħajt jiġġarraf, u l-masġar niedi jwarrad madwar in-nixxiegħa.

Għarqana, iżżerżaq idha lejn Ed. Issib kuxxtejh u idha tiġri lejn il-kużakk. Hu jdur lejha, tħoss sebgħu fuq tarf sidirha, kif tħobb, minn fuq il-flokk. Fid-dizzjunarju ta’ Aquilina, għal sider jagħti fost l-oħrajn il-kelma beżżul, li hu minn fejn joħroġ il-ħalib tal-omm imma li jfisser ukoll xi ħadd bla xorti, patetiku. Tistħajlu jixxejjer u jixxengel bħal sider imdendel, impaħpaħ, mixtieq, hekk kif Ed jogħrokha u jagħġinha u jħollha fix-xejn. L-art tal-masġar ħammiela, niedja, issa mimlija żlieq madwar in-nixxiegħa. Subgħajn Ed jiżgiċċaw taħt iċ-ċinta tat-tights. ’L isfel. ’L isfel. Hemm. Fil-ftuħ.

Subgħajh jitlajjaw, iħufu barra l-għar, jitħakku kontra l-ħnejja taflija biex ħelu ħelu tillaxka u tintefaħ, tiħmar bix-xewqa, ma’ kull tmellisa. Hekk kif ġisimha jintefaħ minn ġewwa, ġisem Ed jintefaħ minn barra. Subgħajh ikomplu jżiegħlu bil-ġilda tarija, imbagħad isibu l-fossa fuq il-quċċata, u hemm jitlgħalha l-oħla deni. Hi u tterter u titkagħweġ bil-gost, subgħajh jixxarrbu u ma jdumux ma joforqu l-ħitan niedja u jintilfu fil-baħħ ġewwieni, bħal għeruq li jinfdu fil-fond, ifittxu l-indewwa tal-art ħammiela. Fid-dlam ċappa, iħoss il-ġewwieni artab u żellieqi, bħal żaqq il-balena ta’ Ġona, li tibilgħu u tostru. (Ara Dubji 2.)

ĦLAS

Ħelsien ta’ ruħ ġdida fid-dinja. Tiġdid tal-ħlejjaq tad-dinja. (Ara iLjun.)

ĦNEJJA

Tħaddan id-daħla ta’ ġisimha. Tismen u tirtab bil-pjaċir meta tmellisha. Il-fossa fil-quċċata tal-ħnejja tagħti l-oħla pjaċir. (Ara Għar Ħasan.) Skont Aquilina, għal klitoride jagħti żibġa wkoll. Ironika għax il-klitoride hi ferm lil hinn miż-żibġa li hi biss in-nitfa li tidher fuq barra. Jeħtieġ insibu termini oħrajn: klavikula, furketta, fossa, il-quċċata tal-klitoride, il-quċċata tal-ħnejja.

INTRADUĊIBBLI

Judith Butler f’Dictionary of Untranslatables jgħidu, “Biex inqalbet ta’ taħt fuq id-distinzjoni sess/ġeneru kien hemm bżonn it-tbegħid kemm mil-lingwistika strutturali kif ukoll mill-antropoloġija kulturali. Imma terġa’ saret aktar importanti ġaladarba kkonċedejna li s-sess u l-ġeneru t-tnejn għandhom il-ġrajjiet tagħhom, u li dawn il-ġrajjiet ivarjaw, skont il-kuntest lingwistiku li fih joperaw. Allura, pereżempju, it-terminu ‘ġeneru’ innifsu matul it-tmeninijiet u d-disgħinijiet, kien kważi impossibbli tittraduċih fi kwalunkwe lingwa rumanza. Kien hemm le genre fil-Franċiż u el género fl-Ispanjol, imma dawn kienu meqjusa kategoriji grammatikali u li m’għandhom x’jaqsmu xejn mal-eżistenza konkreta mġissma ta’ dawk li kienu msejħin jew ‘hu’ jew ‘hi’. Imma kittieba esperimentali bħal Monique Wittig u Jeanette Winterson ikkuntestaw l-idea li l-grammatika kienet fil-fatt separabbli mill-esperjenza fil-ġisem. Les Guérillères ta’ Wittig u Written on the Body ta’ Winterson saru testi provokattivi li ma ħallewx lill-qarrejja tagħhom jiddeċiedu l-ġeneru tal-persunaġġi u l-karattri deskritti. Aktar minn hekk, taw x’jinftiehem li l-ġeneru huwa relatat direttament mat-tipi ta’ kostruzzjonijiet grammatikali li huma taparsi ordinarji jew inevitabbli. Bit-taħlit, bit-taħwid, jew bit-tħassir tal-ġeneru grammatikali, raw kif jillaxkaw il-ħakma li għandhom is-sistemi binarji tal-ġeneru fuq kif naqraw, inħossu, naħsbu, u kif nafu lilna nfusna u lill-oħrajn. L-idealiżmu grammatiku tagħhom wera li kien eċitanti bħala finzjoni esperimentali. Madankollu, l-istituzzjonijiet tal-ġeneru donnhom baqgħu għaddejjin, anki meta xi nies qalbiena rrifjutaw li jagħtu ġeneri mat-twelid lil uliedhom, bl-idea li atti bħal dawn jistgħu jwaqqfu ħesrem l-istituzzjoni tad-differenza tal-ġeneri.”

INTRADUĊIBBLI, L-

Ara Amazzuni, Ġeneru, iLjun, Kaċċa, Lupa, Sqaq, Sess, Xiħa, Xita, Xuxana.

JIEN_A

L-isem kollettiv li għażilna biex niktbu taħtu. (Ara Attribuzzjoni.)

KAĊĊA

Kilba għal ħlejjaq ta’ gost. (Ara Lupa.)

KELLU

L-evoluzzjoni ta’ dal-verb hija relatata mar-rivoluzzjoni li ġrat wara l-lejla tat-trab li jisparixxi. “Kellu”, fis-sens ta’ pussess, xi darba kien verb importanti kemm fil-lingwa prattika, kemm fil-filosofija. Il-maħbubin iddeċidew li ma jibqgħux jagħtu importanza lil dal-verb, u jimmarkawh bħala psewdoverb kif nafuh illum.

LINGWA, IL-

Ara Alfabett, Dubji, Kellu.

iLJUN

F’ġufha tissawwar il-ħajja, tismen u titqal, u tinħeles tiġġerra fil-masġar. Tħobb u trabbi u tisqi, daqstant titrejjaq mill-ħlejqa ġdida, mistagħġba b’kull għaxqa li nsejna. Soda daqs torri li jħares ’il-frieħ tagħha, kennija daqs għar li jħaddanhom, u ħelwa daqs demgħa li tixref ma’ kull milja ta’ ferħ. Aktar ma tismen u titqal, aktar timtela b’saħħa barranija; xejn ma jwaqqafha. Teħles ħajja ġdida, terfagħha f’dirgħajha, tisqiha u ġġorrha f’sorra fuq daharha hi u terħilha għal għonq it-triq. (Ara Ħlas.)

LUPA

Twieġeb sejħet il-qamar kwinta, timraħ f’dawlu fiddien, ħoġorha mdemmija u għajnejha ħadrana jiflu kull rokna mudlama b’leblieba tal-kaċċa. Xuxana, taħtaf kull ħlejqa titħarrek; imġewħa, tinfed nejbietha f’laħamha tari, tiffoxxna mingħajr ebda rażan jew ħabi. Wara li taqta’ l-ġuħ, taf tilgħab bil-ġisem mifni tal-kaċċa tagħha, twaddbu minn naħa għal oħra, imbagħad titilqu f’ġenb, imxebbgħa, u tkompli fi triqitha fid-dalma tal-lejl.

MARA TAS-SULDAT, IL- 

Jien_a 

Jien_a 

Jien_a 

Jien_a 

Għaziża Monique,

Pruvajt insib il-ħin biex nifhmek iżjed 

Imma donnu l-ħin iddominani 

F’sitwazzjoni ta’ skjavitù — 

Kif semmejt f’xi kitba int

Inti semmejt xi ħaġa tgħid 

Bniedem minn kull tnejn huwa mara

U jien_a waħda minnhom 

Imma kultant neħel biex nesprimi 

Eżatt xi nfisser jien_a bħala mara

U x’niswa jien_a bħala mara

Jien_a mara li kultant ma naqbilx miegħi nnifsi għal ħsiebi bħala mara

’Qas naf jekk hux eżatt ħsiebi 

Jew ħsiebi li ġie ffurmat minn dinja rġiel 

So, l-istraight mind ma nafx x’naħseb dwaru 

Jew minn ġo fih 

Għalhekk semmejt l-Instagram

Għall-kelb_a li kelli 

Li qatt ma qgħadt niġġudikalalalulha l-gender 

Rixa ħafifa ttir 

Ma’ kull direzzjoni ta’ lwien 

(xi kliem li qed taqra qed inbiddillu l-Malti jien)

Ħa noħloq dizzjunarju futuristiku mill-ġdid

Meta nqum filgħodu 

U nilmaħ gismi fil-mera

Ma nħobbx narani hi jew hu jew huma

Imma sirt narani Jien_a

Jien_a sar is-sess 

Ta’ liberazzjoni newtrali 

Però meqlub lil kull naħa

Li ngħix ġo fih_a 

Imma nħossni naq’a ħatja 

Li ma rridx inkun aktar hi 

Kif jien twellidt

U hi min hi? 

Daqskemm hemm tipi ta’ hi 

Kategoriji u kategorija

Huma kelmiet li jdejquni

Għax inħossni qiegħda niġġudika

U npoġġi l-fehma tiegħi fuq ħaddieħor 

Mingħajr ma nifhem lil ħaddieħor 

Waqt li sibt naq’a ħin nikteb fuq ħsiebi 

Erġajt mort lura għal dan il-paragrafu 

U naħseb hemm weħilt jien_a 

Fil-konfużjoni tiegħi

“Il-kuxjenza tagħna tal-oppressjoni hija mhux biss reazzjoni għal ġlieda kontra l-oppressjoni. Hija wkoll ir-rivalutazzjoni sħiħa tad-dinja soċjali, ir-riorganizzazzjoni tad-dinja soċjali, ir-riorganizzazzjoni sħiħa b’kunċetti ġodda…”

Jien_a nsejjaħ is-sess tiegħi

“Jien_a”

Hija ħarba jew realizzazzjoni?

Jien_a

Sess: Jien_a 

MASĠAR

In-nisa jitilgħu mas-siġar, jinżlu dirgħajhom mimlijin frott. Hemm minnhom għandhom bxejkliet imqabbdin maċ-ċinturin. Uħud ma jitħarrkux fuq il-vireg tas-slielem, kull waħda f’għoli differenti mill-oħra. Waħdiet jispustaw ruħhom minn fergħa għal oħra. Tarahom jaqbżu għall-art u jeħilsu mit-toqol li qed iġorru. L-imrieżaq immejla tax-xemx jgħaddu mill-weraq u jlellxuhom. Is-sema lewn il-larinġ. (Ara Oriana.)

META

Ara Dati, Metodu, Struttura, Titlu.

METODU

Fl-ewwel sessjoni, wara introduzzjoni dwar Monique Wittig u l-idea tat-trasferenza tal-ideat, kulħadd beda jaħdem għal rasu, mill-perspettiva tagħha. Leanne sabet entrati inkomuni fil-ktieb ta’ Wittig u fil-ktieb tagħha stess L-Inventarju tal-Kamra l-Kaħla. Noah qabdet xi entrati minn Lesbian Peoples: Materials for a Dictionary ta’ Monique Wittig u Sande Zeig u qalbithom għall-Malti, u fl-istess ħin għamlet kumment dwar kull entrata. Matthew u Daniel daħlu f’diskussjoni dwar l-esej “The Straight Mind”, ukoll ta’ Wittig. Charlene bdiet tikteb poeżija/reazzjoni indirizzata direttament lil Monique Wittig. Miriam kitbet rakkont qasir, u ħsibijiet, fost oħrajn, dwar il-kliem espliċitu li n-nisa ma jużawx dwar il-partijiet ta’ ġisimhom. Joe ttraduċa l-entrata dwar l-intraduċibbli u kiteb il-metaentrati. Loranne kitbet l-entrata dwar Monique Wittig u għall-entrata masġar ittraduċiet silta minn Les Guérillères. Bejn it-tieni u t-tielet workshop kulħadd kellu ċ-ċans jaqra t-testi tal-oħrajn. Meta ltqajna l-Ġugar, qgħadna bilqiegħda fuq l-imwejjed ta’ barra, xrobna l-kafè u għall-ewwel ħdimna kollha flimkien. Imbagħad inqsamna fi gruppi iżgħar fejn il-kittieba rrevedew ix-xogħol tagħhom u tal-kittieba l-oħrajn fuq il-mejda tagħhom. Għall-pass li kien imiss għaqqadna kollox f’dokument wieħed u kulħadd seta’ jaħdem fuq kull parti tat-test. Fl-aħħar workshop, li reġa’ kien online, ħadna d-deċiżjonijiet finali dwar it-titlu, l-attribuzzjoni u l-istruttura. Kulħadd reġa’ kellu ċans jagħti l-aħħar titwila lejn ix-xogħol għal ftit jiem, imbagħad Loranne u Joe ħolqu kopja tad-dokument oriġinali u bdew jeditjawh. Wara l-editjar, kulħadd reġa’ ngħata aċċess għad-dokument u għal suġġerimenti finali. It-test intbagħat għand il-qarrej tal-provi. Sadattant, Miriam bagħtet tpinġija u inċiżjoni minn tagħha li ħasset li jmorru ma’ dax-xogħol. Meta t-test ġie lura, tpoġġa — flimkien mat-tpinġija u l-inċiżjoni — fuq il-verżjoni privata tal-website li tintuża għall-provi, u din intweriet lill-kittieba kollha. Meta dawn taw l-aħħar approvazzjoni, ix-xogħol tnieda fuq dan is-sit.

MOVIMENT QAWMIEN VAĠINALI

Għarfien dejjem akbar dwar ġisem il-mara bi mħabba flok mistħija.