C jgħidu li anki l-meteorologi qed jitħawdu dwar it-temp, ma jistgħux ilaħħqu mal-imprevedibbiltà tiegħu. C iżidu jgħidu li l-meteorologi qed jgħidu li se jkollhom bżonn joħorġu b’metodi ġodda.
3 ta’ Ġunju 2024
F’ħolma, S isir ossessjonat b’dak li qed joħroġ miegħu dal-aħħar u li se jara llejla. Jibdew jinħabbu iktar u jieqaf ikellimni għalkollox. F’ħolma oħra, xi ħadd qed jipprova joqtolni d-dar, jirnexxili nitfgħu ’l barra imma jkisser it-tieqa tal-bieb u jerġa’ jidħol ġewwa u joqtolni. Kunċert ta’ Ethel Cain filgħaxija. Niġbor lil B mid-dar. Nasal ftit iktar tard milli ppjanat għax kien hemm problemi fuq il-linja 4 u kelli nbiddel u naqbad il-linja 12 minn Saint Lazare. B liebsa x-xorz mill-kollezzjoni l-ġdida ta’ All-In u hoodie kannella u l-beritta ħamra li tilbes il-ħin kollu. S mhux id-dar, mar jixrob ma’ dak li qed joħroġ miegħu. Irrid nitgħallem ngħix b’din il-possibbiltà — li jqatta’ ħafna ħin ma’ xi ħadd ieħor — speċjalment wara l-ħolma. Noqogħdu fil-kju għal erbgħin minuta fl-istand tal-merchandise għax B trid tixtri T-shirt tat-tour. Hemm band iddoqq qabel Ethel Cain u niddeċiedu li nistennew fil-foyer għax m’aħniex interessati fiha. B tgħidli dwar l-intervista tagħha ma’ marka tal-moda populari aktar kmieni. Hija tgħid li kieku jkollha tmur toqgħod Londra għal dan ix-xogħol. Ethel tibda fid-21h. M’għandniex l-aħjar post. Qegħdin bilwieqfa taħt il-gallarija fuq il-ġenb, iżda xorta nistgħu naraw ċar. Ftit minuti qabel jibda l-kunċert, raġel jikkumplimenta x-xorz ta’ B. Aktar tard B tgħidli li taħseb li dan ir-raġel kien il-boss tal-boss tagħha, id-direttur kreattiv ta’ Givenchy. Ethel Cain toħroġ liebsa velu iswed li tneħħih minnufih hekk kif tasal biex tibda tkanta. Hija tkanta żewġ singles ġodda: “Punish” u “Amber Wave”. Inħossni ferħan, il-vuċi tagħha tagħmilni kuntent. Għall-ħabta tal-21h45 nibgħat lil J biex nara jekk iridx jiltaqa’ wara l-kunċert. Inħossni ċert li jkun tajjeb għalija li niltaqa’ miegħu. Irrid inkun distratt, u nħalli lili nnifsi wkoll ikolli date. Ethel Cain ittemm il-kunċert b’“American Teenager”. Il-folla tkanta u taqbeż ’il fuq u ’l isfel tant li l-art kollha toqmos u ġġiegħel lili noqmos magħha. J jgħid li tajjeb għalih li niltaqgħu. Wara l-kunċert, nimxu lejn Barbès u nieħu l-linja 4. B tmur id-dar, tgħid li se toqgħod ma’ I. Niltaqa’ ma’ J f’Le Progrès li huwa kantuniera bogħod minn fejn kien qalli li jgħix hu. Jidher li għadu kemm ħareġ mid-doċċa, xagħru huwa parzjalment imxarrab u wiċċu jidher frisk. Kien ordnali pinta bil-lest u hu għandu quddiemu nofs pinta. Jistaqsini kif kien il-kunċert u ngħidlu li kien veru sabiħ. Nispjegalu li jien mhux persuna mużikali, li l-gosti tiegħi tal-mużika jew l-għarfien tiegħi tal-mużika huma pjuttost fjakki. Bilkemm jirnexxili nżomm lirika f’rasi. Jgħid li hu l-istess, u jesprimi stagħġib lejn in-nies li litteralment kapaċi jitgħallmu l-lirika f’sekonda. S jibgħatli. Jgħidli li qiegħed id-dar. Jgħid li kien mar id-dar tal-ieħor wara li ħadu drink f’bar. Veru ġie malajr, jiktibli, imma jien ma stajtx niġi. Riedu jorqod għandu imma S qal le għax l-aħħar darba ma raqadx tajjeb ħafna għandu. Naraw Pomeranian għaddej u J jgħid li jixtieq li jista’ jġib pet. Ngħidlu kemm inħobb il-qtates ta’ S, kont bgħattlu ritratt tagħhom meta kont qed ngħix fid-18e. Jgħid li jixtieq iġib qattus, probabbilment minħabba li jirrikjedu manutenzjoni aktar baxxa. Jgħidli l-istorja ta’ meta darba kien qed joħroġ ma’ raġel u kien mar għandu xi ftit drabi. Dar-raġel, apparentament, kellu qattus. Imbagħad ma baqgħux jiltaqgħu. Jgħaddu ftit xhur u fuq profil Tinder J jara ritratt ta’ raġel fil-kamra tas-sodda tal-ieħor. Joħorġu flimkien u eventwalment dar-raġel jieħu lil J fl-appartament tiegħu li, J jikkonferma, huwa l-istess appartament li r-raġel l-ieħor kien ħadu fih. Il-qattus kien hemm. Eventwalment J sar jaf li l-ewwel raġel kien gideb meta qallu li kien l-appartament tiegħu u li l-qattus tiegħu għax fil-fatt ma kinux. Huma tal-ieħor u t-tnejn kienu joħorġu flimkien u l-ewwel raġel kien biss qed jieħu ħsieb il-qattus tar-raġel l-ieħor meta dan kien qiegħed vaganza. Nispiċċaw il-birra u jistaqsini jekk irridx immur għandu. Ngħid iva, ngħatti wiċċi b’idi, biex nesprimi li nħossni mistħi imma rrid nagħmilha. Jgħix fit-triq maġenb Saint-Gervais. L-appartament tiegħu huwa deċenti ħafna. Mhuwiex daqshekk kbir imma huwa mqassam tajjeb. Noqogħdu ħdejn it-tieqa fejn hemm ukoll mejda żgħira li fuqha poġġa żewġ tazzi nbid abjad minn tal-kaxxa — li wissieni li kien xtrah f’mument trashy — u tazza ilma għalija.
4 ta’ Ġunju 2024
Inqum għand J. Insib messaġġ mingħand S jistaqsini jekk irqadtx għandu. Nitgeddes ftit ma’ J imbagħad iġibli tazza ilma. Imur il-boulangerie biex iġibilna pain au chocolate u madeleine. Jagħmel kafè wkoll. Tieħu ħalib? jistaqsini. Jien ngħid iva. Jgħidli li m’għandux ħalib tal-ħafur, imma għandu ħalib tal-baqra. Ngħidlu li tajjeb għalija. Filgħaxija ngħid lil S dwar il-ħolma tiegħi fejn sar ossessjonat b’dak il-ġuvni u fejn jibda jinjorani għalkollox. Jgħid li jien miġnun. Jgħidli li probabbilment hu għandu bżonni f’ħajtu iktar milli għandi bżonn lilu jien. Din sorpriża biex inkun onest, ngħidlu. Konna qed nixorbu fil-bar barra Gaîté Lyrique, li S imbagħad jiddeċiedi li huwa pas très convivial. Immorru L’Ours Martin għal pinta oħra u nieħdu wkoll il-mozzarella u ftit ċips.
5 ta’ Ġunju 2024
Kważi sensazzjoni ta’ mistħija li mhux qed nikteb kollox fid-djarju tiegħi. Mhux nikteb l-istorja kollha, inħalli l-affarijiet barra apposta. Immur għall-qari minn Estelle Hoy u Lisa Robertson filgħaxija f’ħanut tal-kotba fi Strasbourg-Saint-Denis. Hoy tgħid li kmieni fil-karriera tagħha tal-kitba, xi ħadd kien taha parir li kellha tagħżel ġeneru wieħed u żżomm miegħu. Tgħid li kienet sabet dal-parir irritanti u li eventwalment iddeċidiet li ma żżommx ma’ ġeneru wieħed. Lejn l-aħħar, Hoy tgħid li xi nies ħasbu li l-kitba tagħha kienet awtofinzjoni. L-udjenza kollha tistagħġeb bil-kelma “autofiction” bħallikieku saret insult — li tant kemm sar ġeneru trendy, li issa huwa trendy jekk tmur kontrih. Sid il-ħanut tal-kotba u persuna oħra mill-udjenza t-tnejn jaqblu li kultant, meta jaqraw ix-xogħol ta’ Hoy, iħossu li għandhom bżonn jerġgħu jaqrawh għax ma jkunux ċerti jekk kinux fehmu sew x’inhu għaddej fis-sentenza. Fil-fatt persuna mill-udjenza qalet li ħafna drabi hi ma tifhem xejn. Hoy tgħid li jogħġobha dal-fatt. Ma nifhimx għaliex in-nies jaħsbu li hija ħaġa tajba jew impressjonanti li ma nifhmux il-kitba ta’ xi ħadd. Bħallikieku iktar ma l-kitba tkun kumplessa u iktar ma nifhmuhiex aħna l-qarrejja, ifisser li l-kitba aktarx hija tajba ħafna. Konverżazzjoni sħiħa ma’ M u C dwar l-ilbies li qed nilbes; tissejjaħ ġakketta jew blouse?
7 ta’ Ġunju 2024
Irqadt għall-ħabta tal-4h. Dak li żammni mqajjem: l-ewwel, il-ġara titkellem mal-għarus tagħha, imbagħad is-sess tagħhom, imbagħad il-konverżazzjoni li kellhom wara. Ħsibt li se jieqfu jitkellmu u jmorru jorqdu wara li jagħmlu s-sess, u fil-fatt bdejt nistenniehom ilestu, iżda baqgħu jitkellmu għal siegħa oħra wara. Ippruvajt nonfoħ nifs qawwi u anki ċapċapt idejja darbtejn biex nurihom li jien id-dar, u nipprova norqod. M’iniex ċert jekk hix konxja li nista’ nisma’ kollox il-ħin kollu għax il-ħitan huma tant irqaq. Jew forsi ma jimpurtaha xejn. Illum inqum fil-11h. Niġi fil-café tas-soltu biex inkompli naqra All Fours. Naħseb mill-ġdid dwar is-sentenza ta’ E, li kienet qaltli ftit jiem ilu: Nistaqsi lili nnifsi meta se jinduna li jien kerha, għalkemm issa m’iniex ċert jekk kinitx: Nistaqsi lili nnifsi meta se jinduna li jien kerha wisq għalih. Immur għand S. I qiegħed hemm ukoll, kont ilni ma narah. Nistaqsih kif kienu l-vjaġġi tiegħu. Huwa kien l-Olanda, Venezja u t-Turkija. L-Olanda, kien fl-irtir fejn kien għamel meditazzjonijiet intensi aktar kmieni din is-sena. Imma din id-darba, jispjega, kont hemm bħala voluntier. Nistaqsih x’jirrikjedi x-xogħol ta’ voluntier hemm. Bażikament kont qed insajjar, jgħid, imma veru konna understaffed. Suppost konna tmien persuni naħdmu fil-kċina iżda spiċċajna erbgħa. U kellna nsajru għal madwar erbgħin persuna, allura kien daqsxejn intens. S qed ipejjep minn bong tas-silikon bi print ta’ ħafna xufftejn ħomor li d-dealer tiegħu tah b’xejn mal-aħħar ordni tiegħu. Nistaqsih dwar Venezja u jgħid li kienet vaganza sabiħa imma kien wisq eżawrit hemmhekk wara li ħadem ħafna l-Olanda. Nixorbu ftit birer. Ftit iktar tard nirċievi messaġġ. Fl-aħħar wieġeb il-messaġġ tiegħi u jgħid Iva ħadt gost ukoll. Għidli meta trid. Dan jagħmilni ferħan. B tmur torqod għax trid tqum fl-4h, jien u S naraw Ginger Snaps fis-sodda tiegħu imma wara nofs siegħa jgħidli li hu għajjien wisq u se jorqod. Wara ftit minuti nagħlaq il-laptop u nipprova norqod ukoll.
8 ta’ Ġunju 2024
Kont qed nipprova b’saħħti kollha ma nħallix dan iseħħ imma fl-aħħar seħħ u ħassejtni tajjeb. Imbagħad, il-protesta tibda fit-15h u se titlaq minn Bastille imma nitilqu d-dar tard għax S jibda jnaddaf id-dar fl-aħħar minuta. Nieħdu l-linja 4 mbagħad il-linja 1. Nieqfu f’Reuilly-Diderot u nfittxu l-folla billi nimxu lura lejn Bastille. Fl-aħħar insibuha u ningħaqdu magħha. Nimxu sa Nation. Nibgħat messaġġ lil A, li suppost għandi niltaqa’ miegħu. Ngħidlu li lest kmieni u nistaqsih jekk nistax immur issa. Jgħid li kien se jieħu nagħsa ta’ malajr imma li nista’ mmur, ovvjament. Nimxi lejn id-dar tiegħu li tinsab tletin minuta ’l bogħod minn Nation. Jgħix fil-periferija qrib Porte de Montreuil. Hekk kif jiftaħ il-bieb, jibda jbusni. Inkomplu nitbewsu ftit fil-hallway imbagħad ngħidlu li għandi bżonn nieħu doċċa malajr għax kont imxejt ħafna u għeriqt. Huwa jtini xugaman nadif u jien nidħol malajr fid-doċċa. Insibu mimdud fis-sodda. Nitbewsu ħafna. Naqbad dirgħajh u nagħfashom fil-fond tas-saqqu u nilgħaqlu ġismu, inbusu kullimkien. Qed jegħreq minn taħt idejh, l-għaraq tiegħu jipproduċi riħa li togħġobni. Jgħidli li jħobb ħafna l-beaux fesses tiegħi u ninfaqa’ nidħaq. Id-dinamika hija sħuna — kont iltqajt miegħu l-ewwel darba sentejn ilu. Kont ilni biex nerġa’ narah, għamel żmien qisu ma riedx itini wiċċ imma dal-aħħar qisu reġa’ wera interess. F’xi mumenti t-tnejn li aħna nidħqu jew nitbissmu. Nistaqsih għala qed jitbissem hekk u jgħidli bah parce que je suis joyeux quoi (ħeqq, għax kuntent, eh). Jistaqsini jekk irridx li naħxu u ngħid iva. Jiftaħ il-kexxun ħdejn is-sodda tiegħu u joħroġ kaxxa kondoms u lube. Huwa jilbsu. Uġigħ għall-ewwel ftit sekondi mbagħad jibda jgħaġġel iktar u jogħġobni. Ngħidlu li jiddispjaċini li qed ningħi u jgħid li ttih gost anzi. Imbagħad jgħid li kultant ma jkunx ċert jekk inkunx qed ningħi bil-pjaċir jew għax qed inweġġa’. Jien ngħidlu li bil-pjaċir. Jitlobni ngħidlu jekk inweġġa’. A għandu xagħru daqsxejn twil, jasal sa spallejh. Waqt li mimdud fuqi, xagħru spiss jaqa’ fuq wiċċi, f’għajnejja u f’ħalqi imma lili ma jdejjaqni xejn — inħossu jfarfarli u jmellisli xufftejja. Jieqaf u jitfgħu wara widnejh, imma jerġa’ jaqa’ sa ma f’ħin minnhom A iqum, imur iġib band u jorbtu toppu. Nieħdu pawża. Jgħidli dwar filosfa u lingwista Franċiża li nħobb ħafna jien u li kien qalli li kellu xi xogħol magħha fuq il-programm li jaħdem fih hu. Jgħidli kemm kien diffiċli biex jaħdem magħha. Dehret li ma kinitx lesta, baqgħet tgħid li ma tafx dwar xiex trid titkellem. Huwa kien qalilha li se jagħtiha ftit iktar ħin biex tirrifletti u taħseb u jċemplilha lura iktar tard dik il-ġimgħa. Imbagħad meta għamel hekk, qalet li għad m’għandha l-ebda ideat, u wkoll kienet qed tgħid affarijiet li jikkontradixxu dak li kienet qalet waqt l-ewwel telefonata tagħhom. Meta daħlet fl-istudio, lanqas qaltlu bonjour, iżda mbagħad waqt l-intervista dehret tajba u bdiet tpaċpaċ, u wara dehret li kienet ferm iktar amikevoli. Nistaqsih dwar Julia Kristeva għax meta tkellimna ftit ix-xahar li għadda kien bagħatli ritratt tal-ktieb tagħha u jien kont għedtlu li Kristeva togħġobni u qal li se tkun fil-programm tagħhom. Jgħidli li qalet li kienet għadha f’luttu għax sena ilu miet żewġha — Philippe Sollers. Qal li hi ddeskriviet il-luttu mhux bħala stat ta’ diqa iżda iktar wieħed ta’ floating. Ngħidlu li huwa interessanti ħafna u jeħtieġ li din id-deskrizzjoni tiġi miktuba. Inkomplu naħxu. Għalkemm xagħru issa miġbud toppu, xorta xi xagħriet jerġgħu jiddendlu f’ħalqi. Jgħidli li jien sexy u jġegħelni nħossni mistħi għax qatt ma naħseb dwari nnifsi partikolarment sexy, speċjalment meta nkun għarwien. Huwa joqgħod għarkupptejh b’rasi bejn irkupptejh hekk kif jiġi. Jagħtini tour tal-appartament. Il-flatmate tiegħu mhijiex hemm. Nistaqsih jekk hix qiegħda vaganza u jgħid le, qiegħda għand l-għarus tagħha u li kien talabha biex ma tiġix id-dar għax kont ġej jien. Inpejpu sigarett fil-kamra tas-salott tiegħu. Jgħidli iktar dwar ix-xogħol tiegħu. U hu jistaqsini dwar Saffo. Tu veux qu’on s’allonge un peu? (trid nimteddu ftit?) jistaqsini. Nirrepeti dak li jgħid, oui je veux qu’on s’allonge un peu (iva, irrid li nimteddu ftit), nipprova nkun silly jew ċajtier jew xi ħaġa hekk. Jidħaq. Ineħħi l-band minn xagħru u jorbotli l-frenza. Leee, qed nidher ikrah, ngħidlu, u hu jidħaq. Ngħatti wiċċi b’idejja u nneħħiha. Nitgħannqu ftit fis-sodda u hu jerġa’ jibda jisħon. Nirċievi messaġġ mingħand S u jistaqsini jekk irridx immur lura għandu wara u ngħidlu iva. Allura moħħi huwa ffukat li nitlaq daqt. Nitbewsu iktar. Fil-hallway jimbuttani mal-ħajt u jdaħħal idejh fil-qalziet u jaqbadli sormi waqt li jbusni. Nilbes il-ġakketta u ż-żarbun u npoġġi l-basket fuq dahri u jgħidli li jien bien habillé (liebes sabiħ), u jistaqsini minn fejn ġibt il-ġakketta. Ngħidlu li kont xtrajtha minn fripperie qrib Les Halles. Ngħidu ċaw u ngħidlu ejja nerġgħu niltaqgħu dalwaqt. Jien u nieżel it-taraġ inħossni melankoliku — x’aktarx mhux se nerġa’ narah, għax dejjem hekk. Qisu hemm xi forza kosmika tax-xenqa teknoloġika Grindrarkika li tħobb tnikkitni. Nieħu l-metro minn Porte de Montreuil, indum miexi taħt l-art tant li nibda niddubita iniex sejjer fit-triq it-tajba, imma eventwalment immur niġbor lil S mid-dar tiegħu.
10 ta’ Ġunju 2024
Inqum biex inbul diversi drabi matul il-lejl. Noħlom li ninsab xi mkien ħdejn il-baħar f’pajjiż li qisu Malta iżda mhux. Qisu moħħi kiteb mill-ġdid postijiet familjari f’Malta u reġa’ bniehom jew ħoloq verżjoni oħra tagħhom. Sħabi qegħdin hemm imma jien qiegħed waħdi, nimxi fuq il-blat inġorr it-tote bag tiegħi. Jidher li qed jieħdu gost. Meta nqum, nirrakkonta l-ħolma tiegħi lil J. Imbagħad niftakar li ħlomt ukoll li kont ġo pixxina jew jacuzzi. J jistaqsini jekk irridx pasti mill-boulangerie u ngħid le. Jagħmel ftit kafè. Għandu togħma tajba. Nistaqsih jekk hux minn coffee shop indipendenti u jgħid li hu minn Franprix. Jiskuża ruħu talli kien tant fis-sakra l-lejl ta’ qabel. Nitlaq mingħandu għall-ħabta tal-10h30. Qalli li għandu bżonn imur għand l-IKEA biex jixtri bozza ġdida għal-lampa tiegħu. Ir-residenza tiegħi tibda xahar mil-lum u nħossni iktar eċitat. Għamilt il-ġurnata kollha għand S. Inqatta’ waranofsinhar kollu nikteb waqt li hu jaħdem fuq l-iskrivanija tiegħu.
11 ta’ Ġunju 2024
Ilni ma norqod id-dar issa erbat iljieli. Żewġt iljieli għand S għax B tinsab Sqallija, imbagħad lejl għand J, u issa lejl ieħor għand S. Se nħossni stramb norqod fl-appartament orribbli tiegħi mill-ġdid illejla. Niġġebbed fuq il-yoga mat roża fil-kamra ta’ B, li hija l-istess kamra li kont norqod fiha jien meta kont qed ngħix hawn ftit xhur ilu. S jgħidli li jrid imur ix-xogħol fis-13h, u billi naf li B se tirritorna għada f’xi ħin, ngħidlu okay li mbagħad immur lura d-dar.
12 ta’ Ġunju 2024
Nibqa’ erbgħin minuta biss fil-gym għax niddejjaq. Immur id-dar biex nieħu doċċa, nieħu l-linja 13 u mbagħad il-linja 1 għal Palais-Royal – Musée du Louvre biex niltaqa’ ma’ M għall-brejk tagħha. Nistennieha fil-ġonna ta’ Palais Royal waqt li nkompli naqra All Fours ta’ Miranda July li beda interessanti ħafna iżda issa b’xi mod sar boring — li hu tajjeb hu li din hija t-tip ta’ kitba li qed nipprova nagħmel ukoll bil-ktieb tiegħi. Meta tasal M, tistaqsini jekk inħobbx is-sushi u ngħid le. Ngħidilha li okay biex niekol kwalunkwe ħaġa imma s-sushi ma tantx inħobbu. Tgħidli li hemm restorant Ażjatiku tajjeb li jagħmel tiġieġ moqli. Nimxu lejh imma mbagħad naraw li hemm linja enormi. Inkomplu nimxu, nippruvaw insibu fejn nieklu. Eventwalment nispiċċaw nieħdu baguette bit-tiġieġ f’boulangerie qrib ix-xogħol tagħha. Ngħidilha dwar xi ġrali lbieraħ, li peress li s-sodda tiegħi mkissra u kienet qed tibbilanċja fuq munzell kotba li kont poġġejt taħt kull rota fit-tarf tas-sodda, iddeċidejt li narmiha u kelli nniżżel il-qafas tagħha sitt sulari kollha waħdi. Ngħidilha li kien tassew tqil u li benġilt idejja għax kelli nżommu b’mod skomdu li kien jinkludi li nweġġa’ xi ftit lili nnifsi kważi bilfors biex inkun nista’ nimmanuvrah fit-taraġ. Ngħidilha li issa xtrajt qafas tas-sodda ġdid imma mhux se jasalli qabel ġimgħa u nofs oħra. Hi tgħidli li għadha kif xtrat gwardarobba ġdida. Tgħid li hija kuntenta li ħwejjiġha m’għadhomx imdendlin mar-rack u issa qegħdin għall-moħbi. Ngħidilha wkoll dwar A, li ltqajt miegħu nhar is-Sibt li għadda. Ngħidilha li qed nikkraxxja daqsxejn fuqu, u li bagħatli messaġġ siegħa wara li tlaqt mingħandu biex jgħidli li kien ħa pjaċir. Nistqarr magħha li verament irrid nerġa’ narah imma li ma rridx inkun l-ewwel li nikteb. Tgħidli li hi ħażina ħafna f’dawn is-sitwazzjonijiet u wkoll biex tagħti opinjonijiet dwarhom. Nitkellmu dwar Rachel Cusk għax għada se taqra mill-ktieb il-ġdid tagħha u M tgħidli li b’kumbinazzjoni qed taqra l-ebook ta’ Outline tagħha. Nagħmlu pjanijiet biex għada mmorru għall-qari flimkien. Nispiċċaw il-baguette tat-tiġieġ, li kont qed inbati biex nigdem, għax m’għandix ħafna dras. Hija tiftaħ pakkett żgħir popcorn miksi ċikkulata. Tgħidli li wasal ma’ delivery ta’ kampjun fuq ix-xogħol u ħaditu. Nippruvawh. Ngħidilha li għandu togħma tajba u li ddejjaqni meta kultant niekol il-popcorn u jkun fih il-qamħirrun mhux imfaqqa’, u nħossu iebes u kważi nkisser xi sinna, jew li rrid nobżqu minn ħalqi fiċ-ċinema. Nitlaq fis-14h, inwassalha lura x-xogħol. Nistaqsi lili nnifsi jekk għandix nibqa’ ftit barra imma mbagħad niddeċiedi li x’aktarx aħjar immur id-dar. Nieħu l-linja 4 minn Strasbourg-Saint-Denis. Norqod għal tletin minuta mbagħad inqum u nsajjar ftit tofu bil-ħaxix u r-ross.
13 ta’ Ġunju 2024
Lejl ieħor nissielet biex norqod minħabba l-ġara. hello… je suis désolé de te demander ça mais si tu peux parler moins fort ca serait trop bien stp (00:43) (hello… skużani talli qed nitolbok hekk però jekk tista’ titkellem b’mod iktar baxx veru jkun tajjeb [00:43]). Tibgħatli lura: Hello, oui désolé ! (00:47) (Hello, iva, skużani! [00:47]). Nerġa’ nibagħtilha: hi désolé je sais que c est chiant mais j’arrive vraiment pas à dormir… stp c’est tard (01:45) (hi, skużani, naf li vera irritanti imma vera mhux jirnexxili norqod… jekk jogħġbok, huwa tard [01:45]). Ma tweġibx u nispiċċa norqod fit-03h30. Rachel Cusk għandha band aid bajda żgħira bejn is-suba’ l-kbir u l-polz. Nistaqsi lili nnifsi dwar x’seta’ ġara: qatgħet lilha nfisha? Għamlet ħarqa żgħira, forsi mad-dixx hi u toħorġu mill-forn, jew forsi mal-magna tal-kafè? Ilbieraħ jien qtajt il-ponta tas-suba’ l-kbir jien u nqatta’ l-bżar. Imma ma kellix band aid u b’hekk ħallejtu mgeżwer ġo tissue sakemm nixef id-demm. Li nimmaġinaw lura mill-immaġni għal ġol-uman. Deherli li, nimmaġinaw b’lura, hi tgħid, u nsibu forma mistura wara l-immaġni, hija l-umanità għaddejja. Hi tkompli tispjega li qed nitbiegħdu mill-vuċi tal-ieħor jew tal-emarġinati li ħafna drabi jkunu fl-isfond jew fuq wara. Kif inhi distinta n-narrattiva mill-forma? Hija xi ħaġa sabiħa li tirrakkonta l-istejjer, hija xi ħaġa divertenti li tista’ tagħmel. Wieħed jista’ jirrakkonta l-istorja tal-artist u din jibqgħalha xi leġittimità għax huma stess ma kinux irrakkuntawha — dan kien l-impuls ta’ Vasari. Qiegħed bilwieqfa fil-gallarija ta’ ġewwa fil-librerija għax ma kienx hemm post isfel, u jekk inpoġġi fuq is-siġġijiet fuq dan il-livell inkun nista’ nismagħha biss u mhux naraha titkellem. L-intervistatur jgħidilha: Il-mistoqsija dwar l-anonimità dejjem kienet parti mix-xogħol tiegħek. Ninsab fi żwieġ ħażin bejn bil-kitba u l-lingwa, tgħidlu. Il-lingwa verament tassew tgħajjini, iżżid tgħid, aktarx għax l-istint kollu tiegħi hu li nagħlaq ħalqi. Il-progress jidher li huwa lejn l-astrazzjoni, ikompli l-intervistatur, hija xi ħaġa li qiegħda tfittex? Tgħid li dak huwa l-għan, iżda ssib l-iżvilupp fil-ktieb iktar lejn il-femminilità u l-obbligu li tirrappreżenta l-marġinali, u sabiex dan sar l-interess tal-ktieb, il-persunaġġi kellhom iżommu sieq waħda fid-dinja. Inpoġġi bilqiegħda mal-art fil-gallarija kif għamlu ż-żewġ persuni li hawn ħdejja. Ngħolli rasi ’l fuq biex infaqqa’ l-għadma t’għonqi, u nerġa’ nħares ’l isfel, lejn il-kittieba. Hi tgħid, Jippruvaw jifhmu x’kompromess kellhom jagħmlu imma fl-istess ħin ma jistgħux jitilqu mix-xena tar-realtà. Fl-aħħar l-intervistatur jistaqsiha, Huwa obbligu morali li tesprimi dik ir-realtà? Hija aktar dwar il-verità, twieġeb hi. Jekk qed tgħix ħajja femminili ordinarja, tista’ jew tiddeċiedi li taħbi d-diffikultà ta’ dan u taħbiha mid-dinja jew li tirradikalizzaha u tesponi dik id-diffikultà. Huwa tassew diffiċli li mmutu fil-mod kif ngħixu, aħna ddivorzjati daqshekk mill-mewt għax hekk għallmuna nkunu. Il-mewt hija mmedikata ħafna, jew diffiċli wisq biex tipprova twassalha għal konklużjoni morali. Dan mhux mewt, dan hu rimi, hekk qed nipprova ngħid fl-aħħar tal-ktieb. .
