Meta sentejn ilu bdejna Aphroconfuso, konna għedna li l-mezz ewlieni tal-pubblikazzjonijiet tagħna huwa dan il-website. Mill-bidu nett, għamilna appuntament mal-qarrejja għal kull l-ewwel Tnejn tax-xahar. Dan l-appuntament dejjem żammejnieh u x-xogħol ippubblikat fuq is-sit baqa’ jiżdied regolarment anki bejn appuntament u ieħor, minn ġimgħa għall-oħra u minn xahar għall-ieħor. Minn Ottubru li għadda, bdejna nippubblikaw il-kotba stampati; l-ewwel permezz ta’ Antoloġija 1, ġabra bil-kitbiet li dehru fil-ġurnal fl-ewwel sena tagħna, imbagħad f’Marzu bil-pubblikazzjoni ta’ Qarn, li wkoll kien beda bħala silta fuq dan is-sit. Il-ktieb stampat għandu awtorità kważi proverbjali. Ħafna minn din l-awtorità tiġi mill-permanenza tal-karta. Jew għall-inqas il-permanenza li nisperaw li għandha l-karta. Il-preżenza online għandha permanenza ta’ tip ieħor. Il-forom l-oħra tal-arti, bħall-mużika u l-films, kienu ilhom iżidu fil-preżenza permanenti tagħhom b’mezzi bħal ngħidu aħna CDs u DVDs. Iżda l-preżenza u l-aċċessibbiltà tagħhom online issa tagħtihom ubikwità kważi totali. Minkejja l-virtwalità li suppost għandu, l-internet ta lill-kultura tagħna ċertu tip ta’ eternità. L-aħbarijiet ta’ għoxrin sena ilu taċċedi għalihom faċilment daqs l-aħbarijiet tal-lum; bħalma xogħol li ppubblikajna f’Mejju tal-2023 huwa aċċessibbli daqs dak li qed nippubblikaw illum. Online, iż-żmien huwa ċatt. Fil-ħajja personali, inżommu djarju bħala ġest kontra dan l-iċċattjar taż-żmien, biex fil-memorja tagħna nippruvaw nibqgħu nagħrfu jum minn ieħor. Bħal daż-żmien sena nedejna l-Abeċedarju. Dax-xahar qed inniedu l-Almanakk, li huwa kemm eżempju tal-iċċattjar taż-żmien kif ukoll qafas ta’ distinzjoni bejn jum u ieħor, bejn sena u oħra .