Forsi sa ftit żmien ilu, stajt tikkumpatiha l-idea li l-femminiżmu huwa fergħa tal-liberaliżmu. Verament, diġà kien hemm min iwissina li għandna bżonn naħsbu iktar fil-fond dwar das-suġġett, li mhux biżżejjed naċċettaw il-fatt banali li n-nisa għandu jkollhom l-istess drittijiet bħall-irġiel. Li mhux biżżejjed ikollna kapijiet tal-industrija nisa, u presidenti u prim ministri nisa, u nisa jistudjaw l-università: huwa l-qafas innifsu tas-soċjetà kif nafuha li jċaħħad lill-mara mid-drittijiet tagħha. U anki jekk konna nifhmuh dan, anki jekk konna nafu li l-kelma “dritt” forsi hija diġà tip ta’ kompromess, xorta stajna ngħidu li iktar drittijiet qatt mhuma telf, anki jekk ikollna nissaportu retorika ġdida ftit imbarazzanti dwar kemm in-nisa huma kapaċi daqs l-irġiel, anzi forsi iktar, fuq kemm jafu jmexxuha iktar kumpanija, jafu jinnegozjaw iktar, jafu jmorru man-nies, jafu jlaħħqu ma’ ħafna affarijiet fl-istess ħin. Jekk se jkollna mexxejja konservattivi, mhux aħjar jekk nofshom ikunu nisa? Sakemm se nħarrġu l-piloti biex itajru l-F-35, mhux tajjeb li wħud minnhom ikunu nisa? Ngħidu aħna nofshom, jew anki iktar! L-idea li l-femminiżmu neċessarjament jirrikjedi bidla ta’ taħt fuq kienet meqjusa estremista. OK, forsi veru hawn ħafna boyfriends nofs kedda, imma “il-patrijarkat” huwa l-babaw li l-femministi estremisti jridu jbeżżgħuna bih. L-affarijiet jistgħu jkunu differenti mingħajr ma jinbidel xejn. Imbagħad daret xi ħaġa fl-ajru, u ħlief fuq ir-rata tal-fertilità ma nisimgħux, u fuq kemm l-ekonomija hija intrinsikament marbuta ma’ din ir-rata. “Il-mexxejja madwar id-dinja jagħtu fuq wiċċhom li r-rata tal-fertilità wisq baxxa — terġa’ ta’ Malta u l-Italja huma fost l-iktar baxxi,” tgħid Gianna, in-narratur eponimu tan-novella ta’ Loranne Vella li qed nippubblikaw dax-xahar, “li m’aħniex qed nagħmlu biżżejjed ulied biex il-ġenerazzjonijiet tal-ġejjieni ma jkomplux jixjieħu, ma jkomplux jiċkienu.” Ġisem il-mara reġa’ sar dik il-fabbrika li ma nistgħux ngħaddu mingħajrha, fabbrika li trid tlaħħaq mal-livell ta’ produzzjoni meħtieġ mid-demografija, mill-ekonomija. Meta nsibu ruħna f’dan il-punt tal-argument, donna qatt ma naħsbu f’ideat ġodda. Anki jekk, biex naġevolaw ir-rivoluzzjoni fl-intelliġenza artifiċjali, qegħdin fuq ix-xifer ta’ bidliet radikali fis-soċjetà. Meta nikkontemplaw il-kwistjoni demografika, l-unika soluzzjoni li nisimgħu hija ritorn għall-familja tradizzjonali. Li n-nisa jerġgħu jitgħallmu jaħmu l-kejkijiet u joqogħdu d-dar irabbu. U jagħmlu iktar tfal. Imqar 2.1 .