F’liema sens qed naħsbu meta naħsbu f’ħaddieħor? Ir-raġuni u l-emozzjoni huma, sterjotipikament, żewġ kategoriji separati. Jekk qed naħsbu, mela qed nixtarru l-għerf li akkwistajna permezz tar-raġuni, permezz tax-xjenza, u qed nużaw moħħna. Meta nħossu, meta nħennu, jew jisgħobbina, qed nagħmlu xi ħaġa għalkollox separata u qed nużaw, b’xi mod misterjuż, qalbna. F’waħda mill-entrati l-ġodda tal-Kliem fit-Toerija, il-kittieba tagħna jippruvaw isibu traduzzjoni għall-frażi “take care”. Jikkunsidraw l-espressjoni “ħu ħsieb” u waqt li qed jagħmlu dan, jiskopru l-ħafna modi kif il-binarju raġuni/emozzjoni jiċċajpar bil-mod kif nużaw il-kliem relatat ma’ das-sentiment, sa ma l-ħsieb innifsu jasal biex forsi jkun forma ta’ dak li normalment insejħu emozzjoni. “Meta naħsbu f’xi ħadd huwa forma ta’ wens lejhom?” jistaqsi Omar N’Shea. “Nitwennes jien meta nkun naf li qiegħed fi ħsiebek? Isabbarni l-ħsieb li int qed taħseb fija?” F’entrata oħra, fejn seba’ kittieba jiddiskutu traduzzjoni sodisfaċenti għal “politics of care”, Kristina Borg tipprova tfittex it-tifsira tal-kliem fil-konsegwenzi tagħhom: “… li qed nipprova nagħmel, naħseb, hu li nfittex it-tifsira u l-valur tal-azzjoni u l-interazzjoni li tirriżulta meta teżisti l-vera ‘care’.” Dan minn dejjem kien l-iskop tal-Kliem fit-Teorija; li permezz tal-logħba tat-traduzzjoni nġiegħlu lilna nfusna naħsbu sew fuq dawk it-termini li nużaw biex naħsbu bihom u nqarrbuhom lejna, lejn ħajjitna. Permezz tal-ġenerożità tal-kliem, li naħsbu ma’ ħaddieħor huwa wkoll mod kif naħsbu f’ħaddieħor. Manuela Zammit, f’esej li se nippubblikaw iktar tard dax-xahar, tikteb dwar iż-żjarat tagħha lura lejn Malta, żjarat ta’ darbtejn, tliet darbiet fis-sena, żjarat mimlijin ambigwità lejn pajjiż li huwa profondament familjari, għalkemm dejjem jixbah inqas dak il-pajjiż li darba għexet fih. Żjarat li fihom tqatta’ ħafna ħin ma’ nies li mhux partikolarment tixtieq tqatta’ wisq ħin magħhom; iżda li fl-istess ħin tinkwieta li daqt se titlifhom. “Jiena u nersaq lejn il-bieb ta’ barra… tgħaddili minn moħħi li din vera jaf tkun l-aħħar darba, u li lilhom jaf qed jgħaddilhom l-istess ħsieb fl-istess ħin. Ippruvajt ngħidha jien — ‘Narak id-darba li jmiss’ — u vera nstemgħet falza, allura ma rġajtx għamiltha. Id-darba li jmiss forsi ma jkunux għadhom magħna u iktar kemm jgħaddi ż-żmien, iktar tikber din il-probabbilità.” Tibda taħseb li wasal iż-żmien li tuża t-teorija kollha li studjat biex tgħinha tifhem ħajjitha, lil Malta, lill-familja tagħha, li ssir l-oġġett teoretiku tagħha stess. “Ċaw Manuela, sabiħa,” jgħidulha qrabatha qabel tagħlaq il-bieb warajha. “Moħħok hemm.” .