Li gżirietna huma żgħar wisq għall-ambizzjoni tagħna ilna nafuh. Il-fantasija li nkabbru d-daqs ta’ artna billi nżidu magħha xi forma ta’ simenta kbira, bħal Manoel Island artifiċjali li tkun tiflaħ is-sulari vertiġinużi ta’ frugħatna, s’issa għadha ma twettqitx. Il-ftit riklamazzjoni li saret ħolqot l-art fantażma tal-Freeport, li la hi ġewwa u lanqas barra. Iżda ilna li bdejna noħolqu għalina saff ta’ spazju mobbli, ftit piedi kwadri kull familja, minn qabel ma l-art ta’ taħtu kienet saret verament tagħna. Minn dax-xahar, Ryan Falzon jibda jħares lejn dan il-post enormi li tokkupa l-karozza fl-immaġinarju Malti. Fi “Ħruġ mingħajr ħruġ”, esej nostalġiku fuq il-vetturi privati u r-relazzjoni mal-ispazju pubbliku f’Malta, u l-ewwel parti mis-sensiela ġdida Inkejja, Ryan jgħid li “meta l-klassi tal-ħaddiema … saret taffordja toħroġ karozza ġdida … li biha bdiet tmur u tiġi mix-xogħol fil-kumdità u l-privatezza … dan seta’ jitqies bħala pass ’il  quddiem, akkwist ta’ flessibbiltà lil hinn mix-xkiel li wieħed kien ikollu jbakkar biex jilħaq il-vann ipprovdut mill-post tax-xogħol.” Iżda l-karozza, għalina, qatt ma kienet sempliċiment mezz kif naqsmu d-distanzi trivjali ta’ bejn raħal u ieħor. Il-karozza kienet territorju ġdid, personali, appartament u uffiċċju fuq erba’ roti, palk għall-personalità tagħna. Għalkemm issa drajna f’iktar lussu milli kellna fiż-żmien meta l-Escort, ftit mgħolli minn wara, kien jirrenja fit-toroq tagħna, ix-xenqa għall-ispazju żdiedet mhux naqset (anki għax in-numru ta’ karozzi fit-toroq dejjem kompla jiżdied). L-ewwel ċavetta li nieħdu meta nagħlqu t-tmintax hija tal-karozza. “Wieħed jiekol, jara film, ipejjep u jnik fil-privatezza tal-irkejjen mudlama… il-karozza toffri sens ta’ indipendenza u awtonomija — spazju fejn wieħed jista’ jħossu adult f’suq fejn l-aċċessibbiltà ta’ kiri u xiri ta’ proprjetà qiegħda dejjem tonqos. Il-vettura ssir kamra tal-ikel, salott, u kamra tas-sodda f’wieħed, tipprovdi l-privatezza u l-libertà li d-dar tal-ġenituri ma tantx tippermetti.”  .