Ilu biss ftit eluf ta’ snin li l-lingwa għaddiet minn fommna għas-swaba’ ta’ jdejna, minn meta bdejna nnaqqxu fuq il-ġebel, inħarbxu bir-rix u nagħfsu fuq il-buttuni. Fl-esej tiegħu “Il-Magna tal-Qari”, Joe Gatt jitkellem dwar il-preżent bħala l-punt fl-istorja fejn inħossu li dal-fenomenu tal-lingwa, dal-fenomenu li impossibbli nimmaġinaw l-ispeċi tagħna mingħajru, se jittieħed minn idejna minn teknoloġija ġdida li għall-ewwel dehret li kienet biss użu ġdid tal-buttuni. Jaf ikun mument ta’ paniku “għalina li ninvestu parti sostanzjali tal-amor proprju tagħna fil-produzzjoni manwali tat-testi”. Joe jikkwota lil Vilém Flusser, li għalih meta l-magni jieħdu f’idejhom il-kitba, ikunu ħadu f’idejhom l-istorja, imbagħad ikunu jistgħu jiktbu l-istorja kif iridu huma, bil-mod ineżorabbli u għaġġiel tagħhom. Li fażi teknoloġika ġdida tal-kitba tqajjem l-inkwiet mhi xejn ġdid; fl-istess esej naraw kif anki l-introduzzjoni ta’ apparat li llum jidher purament pragmatiku — it-typewriter — kien qajjem eċitament kbir. Il-bidla teknoloġika fil-mod kif il-lingwa hija manifestata f’ħajjitna ma narawhiex biss fil-produzzjoni tal-lingwa. Forsi l-iktar aspett li għadna qed nippruvaw nifhmu u nlaħħqu miegħu huwa d-disseminazzjoni tagħha. Faċli nħossuna maqbudin f’xibka ta’ lingwa li qiegħda taqdi l-bżonnijiet ta’ forzi ikbar minna, forzi li bilkemm nistgħu narawhom, aħseb u ara nifhmuhom. Fit-tieni kapitlu ta’ Nifs: Kaos u Poeżija, li proprju jismu “Vuċi ħoss storbju” u ppubblikajnieh ftit jiem ilu, Franco “Bifo” Berardi jibni l-argument tiegħu billi jibda jiddistingwi bejn l-istorbju medjatiku li ngħixu fih u dak ir-ritmu poetiku, ir-ritmu tal-kożmos li dan l-istorbju qed itarraxxna minnu. Il-poter m’għadux jipprova jiddominana billi jġegħelna nbaxxu rasna għal vuċi waħda u koerenti li ċċaħħadna mill-multipliċità. “Issa, il-poter ifeġġ mix-xita ta’ vuċijiet li ma jinstemgħux,” jgħid Berardi fit-traduzzjoni ta’ Karl Baldacchino. “Il-poter m’għadux jikkonsisti f’li joqgħod jissamma’ bil-moħbi u jiċċensura. Għall-kuntrarju, jistimula l-espressjoni u jfassal regoli ta’ kontroll mill-elaborazzjoni statistika tad-data li toħroġ mill-istorbju tad-dinja. Il-ħoss soċjali jiġi mibdul fi storbju abjad, dak l-istorbju bi frekwenzi intensi uniformi, u dan l-istorbju jsir l-ordni soċjali.” Fit-teorija tal-kommunikazzjoni kif bdieha Claude Shannon, id-differenza bejn storbju u ħoss, bejn storbju u informazzjoni, hija li l-informazzjoni għandha probabbiltà baxxa li teżisti. Iktar ma hemm probabbiltà għolja li xi ħaġa tintqal, iktar ma hemm probabbiltà għolja li tintqal bil-mod kif qiegħda tintqal, iktar qiegħda toqrob lejn l-istorbju. Sakemm għad għandna l-mestjier tal-kitba f’idejna, tajjeb li nużaw il-letteratura biex insibu modi ġodda, modi inqas ordinarji, kif inpoġġu l-kliem .