Meta sentejn ilu bdejna naħsbu biex nibdew dal-ġurnal, ħaġa li konna ċerti dwarha kienet li l-ġurnal irid iservi. Kellna ħafna ideat oħra imma konna nafu li biex jitwettqu, jew biex ikollna ċans nintebħu li kienu żbaljati, il-ġurnal irid iservi. Bil-ħruġ tal-ewwel pubblikazzjoni stampata tagħna lestejna dak li dejjem rajna bħala ċ-ċiklu sħiħ li tgħaddi minnu kitba f’Aphroconfuso. Fil-kultura tagħna, il-ktieb, il-codex, għandu pożizzjoni storika fil-persistenza tal-kelma miktuba. Mhux l-anqas minħabba li l-kotba jservu s-snin u jippermettulna nitkellmu ma’ dawk li jiġu warajna. Jippermettulna wkoll li nitkellmu dwarhom u li nħalluhom jitkellmu flimkien. Jikkritikaw u jikkwotaw lil xulxin u jirreferu għal xulxin. F’dawn is-sentejn skoprejna li kemm il-website u kemm il-podcast huma mezzi oħrajn li jippermettu d-diskors b’mod ieħor. Sibna wkoll mod kif il-format online u dak stampat jaħdmu flimkien. “Bur Mgħeż” u “Qarn” huma żewġ xogħlijiet li bdew online u qed ikomplu jgħixu u jikbru biex jieħdu ħajja ġdida fil-format stampat. Bħalhom għandna diversi proġetti li bdejna naħdmu fuqhom ma’ kittieba li sirna nafu f’dawn is-sentejn. L-ebda test qatt ma joħroġ fil-baħħ, mingħajr kuntest. L-iskop ewlieni tal-editorija huwa li jinħoloq il-kuntest intenzjonat li fih kull kitba tingħata t-tifsira, u tissaħħaħ u tintrabat ma’ testi oħrajn. Mingħajr din id-direzzjoni, il-kliem li jiġi ppubblikat jgħaddi bħal ramel minn bejn subgħajna. Biex jintrabat fil-kitba, fid-dinja, irridu nibnu dawk l-ispazji fejn il-kitba tista’ tiltaqa’ ma’ kitba oħra. Dawn l-ispazji rridu mmantnuhom biex iservu għal snin twal. L-intwizzjoni li kellna fil-bidu — li organu bħal dan biex ikun effettiv irid iservi — issa li bdejna nħarsu lejn it-tielet sena tagħna nindunaw li saret konvinzjoni ċentrali tagħna. Niktbu biex il-kitba tagħna tkun ikbar minna. Bl-istess mod, il-ġurnal innifsu rriduh li jkun ikbar minna, l-individwi li ħolquh .
