Jekk fid-djarju tikteb dak kollu li tgħaddi minnu, fil-kitba l-oħra x’tikteb? Id-djarji li bdejna nippubblikaw fuq Aphroconfuso ftit iktar minn sena ilu huma spazju fejn nistgħu nilagħbu bl-ideat, niktbu dwarhom mingħajr ma nintrabtu li llestu xogħol ta’ xi forma letterarja partikolari. Imma d-djarju, anki sempliċiment il-fatt li qed niktbu taħt data, jagħti lill-kitba ċerta rabta ma’ ħajjitna. Issa li diġà għandna erba’ djarji u qed nintroduċu djarju ġdid dax-xahar (u se jkollna iktar djarji fix-xhur li ġejjin), nistgħu naraw li dik id-data tqanqal mill-kittieba reazzjonijiet differenti. Warren Bartolo joħodha bħala istruzzjoni biex jgħidilna x’għamel dakinhar: “Inqum bil-ħoss tal-airfryer iżarżar u r-riħa ta’ patata ħelwa trejjaħ minn taħt il-bieb tal-kamra tas-sodda tiegħi,” għalkemm malajr isib ruħu jikkonfondi dwar il-forma nnifisha tad-djarju: “nistaqsi, x’jagħmel djarju djarju? Huwa titolu ta’ ktieb? L-inklużjoni ta’ dati preċiżi fil-bidu ta’ paragrafu? L-iżvelar tal-kittieb li l-ktieb tagħhom ħareġ minn perjodu ta’ żamma ta’ djarju?” Loranne Vella tgħidilna li ilha żżomm djarju minn meta kellha għaxar snin u f’kull żmien ikollha iktar minn djarju wieħed miftuħ. Kull wieħed bi skop limitat. Djarju għall-appuntamenti, djarju li tniżżel fih films li rat, djarji ad hoc bħal pitazzi abbinati ma’ vjaġġi speċifiċi. Id-djarju li għandha miftuħ fuq Aphroconfuso huwa ddedikat biss għall-kitba ta’ rumanz ġdid u l-qari u l-esperjenzi marbutin miegħu. Mhux talli hekk, imma waħda mill-ewwel ideat li kellha għal dar-rumanz kienet li tibbażah fuq kitbiet mill-għexieren ta’ djarji li akkumulat tul ħajjitha. “Id-djarju huwa karta mhux ħajja; il-ħajja bħal xibka, u x-xbieki metafora. Id-djarju bħal nisġa minsuġa bil-ħsieb li taqbad, iżda huwa ħafna dak li jirnexxilu jaħrab mill-ispazju bejn għoqda u oħra. Il-ħajja hija dak kollu li jaħrab; mela x’inhu dak li jibqa’ maqbud? X’inhu s-sens tal-kronoloġija?” Davinia Hamilton tiddikjara l-intenzjonijiet tagħha għad-djarju fuq Aphroconfuso mill-bidu nett tal-ewwel entrata: “Nixtieq inżomm djarju, biex forsi nsib irkaptu ta’ ħsibijieti u nġiegħel lil dawn l-ideat għażżenin jieħdu forma.” fatima a.m. tiftaħ entrata b’nota dwar xi ħaġa mundana li tkun għamlet dakinhar u minn hemm titlaq b’idea: “nibda nipprepara biex immur il-parties irriklamati bħala ċelebrazzjoni tas-saħna u tal-aptit, imma d-dress code tinżilli kontr’għasel. mhux l-ewwel darba li sibt ruħi f’dawn il-ħnejjiet tal-kultura tal-clubbing f’Malta, imma d-drabi l-oħra li mort kont kuntenta nkun fit-trufijiet, fil-frenza tal-kultura, inħares u niċċassa mill-bogħod, nitteorizza waħdi u ndur u nitgerbeb fil-garigori tal-ħsibijiet f’moħħi.” Dax-xahar nibdew id-djarju ta’ Joe Gatt fejn jibda jimxi pass pass mal-kitba mill-ġdid ta’ rumanz. Dad-djarju jibda proprju bħal-lum sena, fl-Epifanija u forsi għal ħafna minna, dak li jistennew mill-għaqda ta’ data mal-kliem li nisiltu minnha; xi forma ta’ realizzazzjoni, imqar żgħira, dwar ħajjitna .