Madwar seba’ snin ilu, meta Franco “Bifo” Berardi kien qed jikteb Nifs: Kaos u Poeżija, il-karatteristika li l-iktar kienet tispikka tad-dinja l-ġdida wara l-ewwel rebħa ta’ Donald Trump kienet in-natura postfattwali tagħha. Fejn qabel gidba waħda setgħet ittemm karriera politika, issa bħal konna qattajna darba għal dejjem il-kuntratt epistemoloġiku. Iċ-ċpar proverbjali tal-gwerra jiksi ħajjitna ta’ kuljum, u kull gidba tiġi ribattuta mhux bil-fatti, iżda b’gidba oħra u oħra, kull skandlu bi skandlu ieħor u ikbar li jaljenana minn ta’ qablu. “Il-President Clinton għadda minn proċess ta’ impeachment talli gideb dwar suġġett intimu li ma kellu l-ebda rabta mar-rwol politiku tiegħu,” jgħid Berardi fil-Kapitlu 6 ta’ Nifs li qed nippubblikaw dax-xahar, traduzzjoni ta’ Karl Baldacchino. “Dan l-aħħar, is-suġġett tal-verità politika reġa’ ħa post ċentrali, wara l-pataflun gideb, aħbarijiet foloz, u manipulazzjonijiet redikoli li kellhom rwol kruċjali fil-kampanja ta’ Trump u l-ewwel sena fil-kariga. Permezz tal-multiplikazzjoni ta’ shitstorms fin-networks soċjali u fl-infosfera b’mod ġenerali, ir-reġim tal-verità ħa theżżiża, u wassal biex ġurnalisti u filosofi ewlenin jistaqsu jekk aħniex qed ngħammru f’dinja diskursiva postfattwali.” Illum, l-iktar persuna li għadha tuża l-frażi “fake news” hija Donald Trump innifsu, l-iktar fuq il-midja soċjali tiegħu stess, Truth Social. Għalkemm probabbilment kienet l-inkompetenza tiegħu waqt żmien il-COVID 19 li tellfitu l-elezzjoni tal-2020 lil Trump, l-effetti tal-pandemija fuq il-psike dinjija kienu responsabbli għar-rebħa tiegħu iktar qawwija tal-2024. Illum nafu li l-pandemija għamlet ħerba minn ħafna veritajiet antiki, iżda Berardi, li kien qed jikteb qabel il-COVID 19, ifittex is-sors tal-qalba għal dinja postfattwali f’dak li ġara wara pandemija li ġiet qabel. “Il-fatt li l-kriżi [tal-AIDS] identifikat il-pjaċir mal-mard bil-mod dawwar il-ħajja soċjali f’deżert. Temmew għexieren ta’ snin ta’ solidarjetà soċjali u mħabba ħielsa, u segwiet il-mutazzjoni diġitali, u meta t-teknoloġija diġitali ppervadiet l-isfera tal-komunikazzjoni tal-bniedem, din issostitwiet il-konġunzjoni bil-konnessjoni. Anki jekk trasmessa bil-kuntatt sesswali, l-AIDS kienet prinċipalment epidemija psikomedjatika. Kienet ibbażata fuq il-komunikazzjoni ta’ retrovirus, iżda rriżultat fil-komunikazzjoni tal-biża’. Meta l-kuntatt mal-ġisem tal-Ieħor beda jiġi pperċepit bħala periklu — u meta dan is-sens ta’ periklu rabba’ l-għeruq fl-inkonxju soċjali — il-lingwa ttrasmigrat mill-isfera konġuntiva għal dik konnettiva.” Kliem Berardi llum jgħodd iktar minn meta kitbu. Waqt il-pandemija tal-COVID 19, l-iżolament kellu l-effett li jnaqqas il-kuntatt personali u jkompli jżid id-dipendenza fuq il-kuntatt diġitali; borma tbaqbaq perfetta għad-dinja postfattwali. Il-fatti, jgħidilna Berardi, huma frott ir-relazzjonijiet ta’ bejnietna. Meta tinqered l-intimità, jew tkun primarjament ikkomodifikata permezz tal-mezzi diġitali, l-informazzjoni ma tibqax ankrata fil-ħajja tal-bniedem, u ssir manipulabbli u evanexxenti daqs kull riklam ieħor li naraw f’kull mument ta’ ħajjitna .